প্ৰতিদিনে সমগ্ৰ দেশৰ লগতে ৰাজ্যতো অপ্ৰতিৰোধ্য গতিত কৰোনা ভাইৰাছৰ সংক্ৰমণ বৃদ্ধি পাইছে।
যোৱা দুটা দিনত কেৱল ডিব্ৰুগড়তে প্ৰায় ৭০০ গৰাকী লোক কৰোনা ভাইৰাছত আক্ৰান্ত হৈছে।
যোৱা দুটা দিনত জিলাখনত মুঠ ৬৯৭ গৰাকী লোকৰ শৰীৰত কোভিড১৯ৰ অৱস্থিতি ধৰা পৰিছে। ইয়াৰ ফলত জিলাখনত কোভিড সংক্ৰমিত লোকৰ সংখ্যা ৩০৪৮ গৰাকীলৈ বৃদ্ধি পালে।
ইফালে দ্বিতীয় ঢৌৰ কৰোনাত আক্ৰান্ত হৈ জিলাখত এতিয়ালৈকে ২৪ গৰাকী লোকৰ মৃত্যু হৈছে।
স্বাস্থ্য বিভাগৰ তথ্য অনুসৰি দ্বিতীয় ঢৌৰ কৰোনাত যুৱ চামৰ যথেষ্ট সংখ্যক আক্ৰান্ত হোৱা দেখা গৈছে।
ইফালে কৰোনাৰ দ্বিতীয় ঢৌৱে দেশৰ লগতে ৰাজ্যত আতংকময় পৰিৱেশ সূচনাৰ কৰাৰ পৰিপ্ৰেক্ষিতত ৰাজ্য প্ৰশাসনে আজিৰে পৰা নতুন কোভিড নীতি বলৱৎ কৰিছে।
নতুন কোভিড নীতি অনুসৰি সমগ্ৰ ৰাজ্যৰ লগতে জিলাখনত বিয়লি ২ বজাত দোকান-পোহাৰ বন্ধ কৰিব লাগিব আৰু সন্ধিয়া ৬ বজাৰ পৰা পুৱা ৫ বজালৈকে নৈশ সান্ধ্য আইন বলৱৎ থাকিব।
আনহাতে কৰোনা মহামাৰীয়ে সমগ্ৰ দেশৰ লগতে ডিব্ৰুগড় জিলাৰ জনসাধাৰণৰো অৰ্থনৈতিক অৱস্থা অতি বিধ্বস্ত কৰি তোলা পৰিলক্ষিত হৈছে।
বিগত বৰ্ষৰ লকডাউনতে কঁকাল ভাঙি পৰা বহু ক্ষুদ্ৰ ব্যৱসায়ী, দৈনিক মজুৰী কৰা লোকসহ অন্যান্য ব্যৱসায়িক প্ৰতিষ্ঠানসমূহ নতুন কোভিড নীতিৰ দ্বাৰা পুনৰ ক্ষতিগ্ৰস্ত হ’ব বুলি মন্তব্য কৰিছে।
ইফালে আন এক লকডাউনৰ আশংকাতো দিন পাৰ কৰা দেখা গৈছে জিলাখনৰ একাংশ ব্যৱসায়ীসহ বাসিন্দাক।
“যদি চৰকাৰে আন এক লকডাউন ঘোষণা কৰে, তেন্তে আমি ধ্বংস হৈ ৰাস্তাত বহিব লাগিব। যোৱা বছৰৰ লকডাউনতে আমাৰ অৰ্থনৈতিক অৱস্থা কাহিল হৈ পৰিল।” ডিব্ৰুগড়ৰ এজন ব্যৱসায়ীয়ে এইদৰে কয়।
