কেৱল চহৰাঞ্চলতে আৱদ্ধ থকা নাই কৰোনা ভাইৰাছৰ সংক্ৰমণ। ক্ৰমান্বয়ে ভয়ংকৰ ৰূপ ধাৰণ কৰি কৰোনাই এইবাৰ প্ৰৱেশ কৰিছে চাহ বাগিচাত।
ইতিমধ্যে উজনি অসমৰ ডিব্ৰুগড় জিলাৰ টেঙাখাট ৰাজহ চক্ৰৰ অন্তৰ্গত জালনি চাহ বাগিচাৰ শ্ৰমিকসহ ৯০ গৰাকী কৰ্মচাৰীৰ শৰীৰত কৰোনাৰ অৱস্থিতি ধৰা পৰিছে।
বাগিচাখনৰ বৃহৎ সংখ্যক শ্ৰমিক আৰু কৰ্মচাৰী কোৰোনাত আক্ৰান্ত হোৱাৰ খবৰ লাভ কৰাৰ লগে লগে টেঙাখাট ৰাজহ চক্ৰ বিষয়া, স্বাস্থ্য বিভাগৰ বিষয়াসকলে বাগিচাখনলৈ ধাপলি মেলে।
বিষয়াসকলে পৰিস্থিতি বুজ লৈ ইতিমধ্যে বাগিচাখন বন্ধ কৰি কণ্টেইনমেন্ট জ’ন হিচাপে ঘোষণা কৰিছে।
আনহাতে বাগিচাৰ চিকিৎসালয়খনৰ সৈতে আৰু দুটা ষ্টাফ কোৱাৰ্টাৰক অস্থায়ী কোভিড চেন্টাৰ ৰূপে নিৰ্মাণ কৰি কৰোনাক্ৰান্তসকলক তাতে চিকিৎসা প্ৰদান কৰি থকা হৈছে।
আইডিএছপিৰ বিষয়া ডাঃ নৱজ্যোতি গগৈয়ে জনাইছে যে বুধবাৰৰ পৰা বাগিচাখনত ভেকচিন প্ৰদান আৰম্ভ কৰা লগতে চেনিটাইজেশ্যন কৰাও হৈছে।
ইফালে চাহ বাগিচাখনৰ সংগঠনবোৰে সমগ্ৰ চাহ বাগিচাখনতে অতি শীঘ্ৰে টিকাকৰণৰ দাবী কৰিছে। তেওঁলোকে দাবী কৰিছে যে বাগিচাৰ শ্ৰমিকসকল ওচৰা ওচৰিকৈ বাস কৰাৰ বাবে চাহ বাগিচাখনত দ্ৰুত গতিত কৰোনা ভাইৰাছ বিয়পি পৰিব।
“আমি চৰকাৰক চাহ বাগিচাত টিকাকৰণৰ অভিযান চলাবলৈ দাবী জনাই আহিলেও চাহ বেল্ট এলেকাত টিকাকৰণ কৰাত চৰকাৰ ব্যৰ্থ হৈছে। কোভিড১৯ৰ দ্বিতীয় ঢৌ হৈছে আগৰ তুলনাত অধিক বিপদজনক।” অসম চাহ জনজাতি ছাত্ৰ সন্থাৰ (এটিটিএছএ) এগৰাকী নেতাই সংবাদ মাধ্যমৰ আগত এইদৰে কয়।
বাগিচাখনত শ্ৰমিকসহ ৯০ জনকৈ কৰ্মচাৰীৰ শৰীৰত কোভিডৰ অৱস্থিতি ধৰা পৰাৰ পিছতে কেৱল জালনি চাহ বাগিচাতেই নহয় অন্যান্য চাহ বাগিচাসমূহতো কৰোনা সংক্ৰমণ হোৱাৰ আশংকাই দেখা দিছে।
