প্ৰাক্তন কেন্দ্ৰীয় মন্ত্ৰী তথা প্ৰসিদ্ধ কংগ্ৰেছ নেতা মাতংগ সিঙৰ কোভিড-১৯ত আক্ৰান্ত হৈ পৰলোকপ্ৰাপ্তি ঘটিছে।
মৃত্যুৰ সময়ত মাতংগ সিঙৰ বয়স আছিল ৫৮বছৰ।
বৃহস্পতিবাৰে পুৱা দিল্লীৰ এখন হাস্পাতলত মাতংগ সিঙে শেষ নিশ্বাস ত্যাগ কৰে।
যোৱা ২২ এপ্ৰিলত সিঙৰ কোভিড-১৯ পজিটিভ ধৰা পৰিছিল।
অসমত মাতংগ সিং ব্যক্তিগত টিভি চেনেলৰ প্ৰথমগৰাকী স্বত্ত্বাধিকাৰী হিচাপে ভালদৰে পৰিচিত আছিল।
মাতংগ সিঙে অসম তথা উত্তৰ–পূৰ্বাঞ্চলত ২০০০চনত অঞ্চলটোৰ প্ৰথমটো ছেটেলাইট চেনেল নৰ্থইষ্ট টেলিভিশ্বন (NETV হিচাপে জনপ্ৰিয়) মুকলি কৰিছিল।
তেওঁ ১৯৯২চনত অসমৰ পৰা ৰাজ্যসভালৈ নিৰ্বাচিত হৈছিল আৰু ১৯৯৪চনৰ পৰা ১৯৯৮ চনলৈকে সংসদীয় পৰিক্ৰমা বিভাগৰ কেন্দ্ৰীয় ৰাজ্যমন্ত্ৰী হিচাপে কাৰ্যনিৰ্বাহ কৰিছিল।
১৯৬২চনত অসমৰ তিনিচুকীয়াত এছ পি সিং আৰু ৰাণী ৰুক্মিনী সিঙৰ পুত্ৰ মাতংগ সিঙৰ জন্ম হৈছিল।
উল্লেখ্য যে সাৰদা শ্বিট ফাণ্ড কেলেংকাৰীত ২৮কোটি টকাতকৈয়ো অধিক টকাৰ অপব্যৱহাৰ কৰাৰ লগতে অপৰাধমূলক ষড়যন্ত্ৰ, প্ৰৱঞ্চনাৰ অভিযোগত চিবিআইয়ে সিঙক যোৱা ২০১৫চনৰ ৩১ জানুৱাৰীত গ্ৰেপ্তাৰ কৰিছিল।
