বিশ্বনাথ চাৰিআলি অসামৰিক চিকিৎসালয়ৰ ক’ভিড কেয়াৰ চেন্তাৰত কভিড আক্ৰান্ত দুগৰাকী প্ৰসূতিয়ে জন্ম দিলে দুটি সন্তান।
তাৰে এগৰাকী বিহালী ৰাংচালী গাঁৱৰ নিৰ্মলা বাউৰি নামৰ প্ৰসূতিয়ে ১৮ মে তাৰিখে বিশ্বনাথ চাৰিআলি অসামৰিক চিকিৎসালয়ৰ ক’ভিড কেয়াৰ চেন্টাৰত জন্ম দিয়ে পুত্ৰ সন্তান।
তাৰ পিছ দিনাই অৰ্থাৎ কালি পুনৰ এই ক’ভিড কেয়াৰ চেন্টাৰত বিশ্বনাথৰ নীলপুৰ চাহ বাগিচাৰ লিকিটা গোৱালা নামৰ প্ৰসূতিগৰাকীয়ে জন্ম দিয়ে এটি কন্যা সন্তান।
দুয়ো গৰাকী প্ৰসূতিয়ে বিশ্বনাথ চাৰিআলি অসামৰিক চিকিৎসালয়ত ক’ভিড ৰোগত আক্ৰান্ত হৈ চিকিৎসাধীন হৈ থকাৰ সময়তে বিশ্বনাথ চাৰিআলি অসামৰিক চিকিৎসালয়ৰ চিকিৎসক সকলৰ প্ৰচেষ্টাত স্বাভাৱিক প্ৰসৱ কৰাই জন্ম দিয়ে এই দুটি সুস্থ সৱল সন্তান ।
ইতিমধ্যে বিশ্বনাথ অসামৰিক চিকিৎসালয় কৰ্তৃপক্ষই এই দুই গৰাকী প্ৰসূতিকে যথেষ্ট যত্ন লোৱা বুলি প্ৰকাশ কৰিছে।
ইপিনে জন্ম হোৱা সন্তান দুটি ক’ভিড আক্ৰান্ত নে ক’ভিড মুক্ত সেয়া এতিয়াও জানিব পৰা যোৱা নাই।চিকিৎসকে দুদিনৰ পিছতহে জন্ম হোৱা শিশু দুটিৰ ক’ভিড টেষ্ট কৰিব,আৰু তাৰ পিছতহে গম পোৱা যাব সন্তান দুটিৰ শাৰীৰিক অৱস্থাৰ বিষয়ে।
যি কি নহওক ,বিশ্বনাথ চাৰিআলি অসামৰিক চিকিৎসালয়ত এইদৰে দুগৰাকী ক’ভিড আক্ৰান্ত প্ৰসূতিয়ে সুস্থ সৱল সন্তান জন্ম দিয়াৰ ঘটনাই সাধাৰণ ৰাইজৰ মনত নিৰাশাৰ সময়ত এক আশাৰ বতৰা কঢ়িয়াই আনিছে।
