অৱশেষত অ’এনজিচিৰ অপহৃত কৰ্মচাৰী ৰিতুল শইকীয়াক আলফা স্বাধীনে মুকলি কৰি দিলে। শনিবাৰে পুৱা ৭-১৫ বজাত ভাৰত-ম্যানমাৰৰ সীমান্তৰ মন জিলাৰ লংৱাত ৰিতুল শইকীয়াই প্ৰৱেশ কৰে।
নাগালেণ্ডৰ মন জিলাত ৰিতুল শইকীয়া সেনা আৰু আৰক্ষীৰ বেষ্টনীৰ মাজেৰে প্ৰৱেশ কৰে।
তিনিদিন পূৰ্বে আলফা স্বাধীনৰ মুখ্য সেনাধ্যক্ষ পৰেশ বৰুৱাই ৰিতুল শইকীয়াক মুকলি কৰি দিয়াৰ কথা ঘোষণা কৰিছিল।
বৃহস্পতিবাৰে মুখ্যমন্ত্ৰী ড০ হিমন্ত শৰ্মাই এখন সংবাদমেলত পৰেশ বৰুৱাক অপহৃত ৰিতুল শইকীয়াক মুকলি কৰি দিবলৈ আহ্বান জনাইছিল।
মুখ্যমন্ত্ৰীৰ আহ্বানৰ পাছতে পৰেশ বৰুৱাই এশ ঘণ্টাৰ ভিতৰত ৰিতুল শইকীয়া স্ব-গৃহ পাবহি বুলি জনাইছিল।
উল্লেখ্য যে যোৱা ২১ এপ্ৰিলৰ নিশা লাকুৱা তৈল ক্ষেত্ৰৰ পৰা অ’এনজিচিৰ কৰ্মচাৰী ৰিতুল শইকীয়াক আলফা স্বাধীনে অপহৰণ কৰি নিছিল।
অপহৃত ৰিতুল শইকীয়াক মুকলি কৰি দিয়াৰ পাছতে তেওঁৰ পৰিয়ালে আলফা স্বাধীনৰ সেনাধ্যক্ষ পৰেশ বৰুৱা আৰু মুখ্যমন্ত্ৰী ড০ হিমন্ত বিশ্ব শৰ্মাক ধন্যবাদ জনাইছে।
