চাবুৱা থানাৰ ভাৰপ্ৰাপ্ত আৰক্ষী বিষয়া এগৰাকীক ঘুঁচিয়াই দাঁত ভঙা গোচৰত অভিযুক্ত হোৱা গোচৰটো NIA ই লৈছিল।
ইতিমধ্যে, কেইমাহমান পূৰ্বে গোচৰটোত জামিন লাভ কৰিছিল যদিও আজি NIA আদালতে গোচৰটোৰ পৰা দোষমুক্ত কৰে কাৰাৰুদ্ধ অখিল গগৈক।
কিন্তু এতিয়াও যেন অখিল গগৈৰ ডিঙিৰ পৰা NIA ৰ কাঁইটডাল আঁতৰা নাই। এতিয়াও চান্দমাৰী থানাৰ গোচৰটোৰ পৰা মুক্ত হোৱা নাই কাৰাৰুদ্ধ অখিল গগৈ।
চাবুৱা থানাৰ UAPA ৰ ধাৰা সংযোগ কৰি NIA ৰ অধীনলৈ হস্তান্তৰ কৰা NIA-GUW-01-2020 নং গোচৰটো অখিল গগৈক কিছু সময়ৰ পূৰ্বে UAPA ৰ পৰা সম্পূৰ্ণ মুক্ত আৰু নিৰ্দোষী হিচাপে ঘোষণা কৰিছে আদালতে।
জানিব পৰা মতে, এতিয়া চানমাৰি থানাৰ গোচৰৰ শুনানি চলি আছে NIA ৰ আদালতত। এই গোচৰত জামিন লাভ কৰিলেই শীঘ্ৰেই মুকলি আকাশৰ তললৈ আহিব বিধায়ক অখিল গগৈ।
চাবুৱা থানাৰ গোচৰত জগজিত গোঁহাই, ভূপেন গগৈ আৰু অখিল গগৈক দোষমুক্ত কৰে। অৱশ্যে অখিল গগৈয়ে পূৰ্বতে এই ক্ষেত্ৰত জামিন লাভ কৰিছিল। আনহাতে, ভাস্কৰজ্যোতি ফুকনে লাভ কৰা নাই জামিন।
ৰাইজৰ দলৰ দাবী চানমাৰি থানাৰ গোচৰত জামিন প্ৰদান কৰি শীঘ্ৰেই ৰাইজৰ দলৰ সভাপতি তথা শিৱসাগৰ বিধানসভা সমষ্টিৰ বিধায়ক অখিল গগৈক মুক্তি দিব লাগে।
ইপিনে, কাৰাৰুদ্ধ অখিল গগৈয়ে আজি পুনৰ অসমবাসী ৰাইজলৈ এখন পত্ৰ প্ৰেৰণ কৰে।
পত্ৰখনৰ জৰিয়তে অখিল গগৈয়ে কয়, ‘চৰকাৰে জুমলাবাজি আৰু ভেল্কিবাজী বন্ধ কৰক। অসমবাসীৰ বাবে কিবা এটা কৰক। অসমতো একনায়কত্বৰ পদধ্বনি শুনা গৈছে। কোভিড আৰু লকডাউনে অসমবাসী ৰাইজক কোঙা কৰিলে। ৰাইজৰ পানীত হাঁহ নচৰা অৱস্থা হৈছে। চৰকাৰে ভুৱা ৰাজনৈতিক প্ৰতিশ্ৰুতি বন্ধ কৰক।‘
