বৃহস্পতিবাৰে কাৰাগাৰৰ পৰা মুক্ত হৈ আয়োজন কৰা এখন সংবাদমেলত বহু বিস্ফোৰণ ঘটালে কৃষক নেতা তথা শিৱসাগৰৰ বিধায়ক অখিল গগৈয়ে।
অখিল গগৈয়ে ক’লে, ‘’মই কাৰাগাৰত নথকা হ’লে বিজেপিয়ে চৰকাৰ গঠন কৰিব নোৱাৰিলেহেঁতেন। সাহস থকা হ’লে চৰকাৰে মোক বাহিৰত ৰাখি নিৰ্বাচনত অৱতীৰ্ণ হ’ব লাগিছিল।’’
কা-আন্দোলনৰ বাবে জে’ললৈ যাৱলগীয়া হোৱা অখিল গগৈয়ে কা আন্দোলন সন্দৰ্ভত মন্তব্য কৰি কয় যে পৃথিৱীৰ ইতিহাসত হয়তো এনেকুৱা আন্দোলন হোৱা নাছিল।
চৰকাৰে সংগঠনসমূহ আৰু সাধাৰণ ৰাইজৰ মাজত বিভেদ আনি ‘কা’ আন্দোলন স্থগিত কৰাৰো অভিযোগ আনিলে। জাতীয় সংগঠনসমূহে চৰকাৰৰ চক্ৰান্তত ভৰি দিলে বুলিও উল্লেখ কৰি গগৈয়ে কয় যে জাতীয় সংগঠনে অসমীয়া জাতিক কৰা বিশ্বাসঘাতকতাৰ বাবেই ‘কা’ আন্দোলন ব্যৰ্থ হ’ল।
‘‘মোক গুলীয়াবলৈ কেন্দ্ৰৰ পৰা নিৰ্দেশ আহিছিল। উপায়বিহীন হৈ মই গ্ৰেপ্তাবৰণ কৰিবলৈ বাধ্য হ’লো। জে’লত মোক তিল তিলকৈ শাস্তি দিছিল। আৰএছএছত যোগদান কৰিলে মোক ১০ দিনৰ ভিতৰত মুকলি কৰি দিয়াৰ কথা কোৱা হৈছিল।‘’ এইদৰেই চৰকাৰৰ বিৰুদ্ধে ভয়ংকৰ অভিযোগ আনিলে অখিল গগৈয়ে।
বিধানসভাত প্ৰতিটো মিছা কথাৰ মুখ খোলাৰ সংকল্পৰ কথা উল্লেখ কৰি বিধায়কগৰাকীয়ে অসমৰ বিশেষ ৰাজ্যৰ মৰ্যাদা ঘূৰাই অনাৰ বাবে মাত মতাৰ লগতে ‘কা’ বাতিল কৰাৰ অংগীকাৰো দোহাৰে।
বৃহৎ নদীবান্ধ বন্ধ কৰিব লাগিব বুলি দোহাৰি গগৈয়ে ছিণ্ডিকেট বন্ধ কৰাৰো হুংকাৰ দিয়ে। তেওঁ বিজেপিয়ে কয়লা, চুপাৰি, কণী, মাছৰ ছিণ্ডিকেট চলাই থকা বুলি গুৰুতৰ অভিযোগ আনে। তেওঁ টোলগে’টসমূহো লাহে লাহে বন্ধ কৰাৰ ব্যৱস্থা কৰিব বুলি মন্তব্য কৰে।
আনহাতে, লকডাউনত ক্ষতিগ্ৰস্ত সকলোকে ক্ষতিপূৰণ দিবলৈ চৰকাৰক আহ্বান জনায় বিধায়কগৰাকীয়ে।
ইপিনে, এপিএছচি কেলেংকাৰীৰ তদন্তত প্ৰাক্তন মুখ্যমন্ত্ৰী সৰ্বানন্দ সোণোৱাল আৰু মুখ্যমন্ত্ৰী হিমন্ত বিশ্ব শৰ্মাকো তদন্তৰ আওতালৈ অনাৰ দাবী কৰে অখিল গগৈয়ে।
