ৰাজ্যৰ স্বাস্হ্য বিভাগে ঘোষণা কৰা নতুন এছ অ’ পিত বিশ্বনাথ জিলাক পুনৰ বাৰ কণ্টেইনমেন্ট জিলা হিচাপে ঘোষণা কৰিছে আৰু যোৱা ২০ জুলাইৰ পৰা বলৱৎ হৈছে।
অৱশ্যে বৰ্তমান বিশ্বনাথ জিলাত কৰোনাৰ সংক্ৰমণ কিছু পৰিমাণে
নিয়ন্ত্ৰণ হোৱা পৰিলক্ষিত হৈছে।
ক’ভিড পজিটিভৰ হাৰ কিছু পৰিমাণে হ্ৰাস পাইছে। উল্লেখ্য যে যোৱা ২৬ জুনৰ পৰা বিশ্বনাথ জিলা টোটেল কন্টেইনমেণ্ট জ’নত আছে ।ইফালে এসপ্তাহৰ বাবে ঘোষণা কৰা এই নতুন নিৰ্দেশনা অনুসৰি টোটেল কণ্টেইমেন্ট জ’ন হিচাপে ঘোষণা কৰা জিলা সমূহত বিয়লি ৫ বজালৈকে অত্যাৱশ্যকীয় সামগ্ৰীৰ দোকান সমূহ খুলিব পাৰিব যদিও বিশ্বনাথ জিলাত বিশ্বনাথ জিলা প্ৰশাসনৰ পৰা নিজাববীয়াকৈ কেতবোৰ নিৰ্দেশনা জাৰি কৰিছে।
সেই অনুসৰি বিশ্বনাথ জিলাৰ পৌৰ সভাৰ অন্তৰ্গত সকলো গেলামালৰ দোকান বন্ধ থাকিব।
আনহাতে জিলাখনৰ লেহুগাঁও গাঁও পঞ্চায়তৰ ৭ নং ৱাৰ্ডৰ চেল পেট্ৰ’ল পাম্পলৈকে বন্ধ থাকিব গেলামালৰ দোকান সমূহ। আনহাতে পৌৰ সভাৰ বাহিৰৰ এলেকা সমূহৰ গেলামাল দোকান সমুহ দুপৰীয়া ১২ বজালৈকেহে খোলা ৰাখিব পাৰিব।
সম্প্ৰতি ৰাজ্য চৰকাৰে ঘোষণা কৰা এই নতুন এছ অ’ পি সন্দৰ্ভত প্ৰতিক্ৰীয়া প্ৰকাশ কৰিছে বিশ্বনাথৰ ৰাইজে।
উল্লেখ্য যে টোটেল কণ্টেইনমেন্ট জিলা হোৱাৰ বাবে বিশ্বনাথৰ দৰিদ্ৰ ৰাইজৰ এতিয়া পানীত হাঁহ নচৰা অৱস্হা হৈছে।
সামান্য এখন পান তামোলৰ দোকান দি পৰিয়াল পোহপাল দি থকা একাংশৰ এতিয়া জীৱিকা অৰ্জনৰ পথ একেবাৰে স্তব্ধ হৈ পৰিছে। ইফালে বিশ্বনাথ জিলাত এতিয়া পজিটিভ ৰোগীৰ সংখ্যাও হ্ৰাস পাইছে।
তেনেস্হলত খাটি খোৱা ৰাইজৰ কথা চিন্তা কৰিয়েই বিশ্বনাথত কিছু শিথিলতাৰ মত পোষণ কৰিছে ৰাইজে। সামাজিক মাধ্যমতো এই সন্দৰ্ভত ব্যাপক চৰ্চা হৈছে।
আনহাতে যিহেতু আন্তজিলা যাতায়ত বন্ধ হৈ আছে তেনে ক্ষেত্ৰত লখিমপুৰ আৰু শোণিতপুৰ জিলাত অনিয়ন্ত্ৰীত হৈ থকা ক’ৰোনাৰ বাবে বিশ্বনাথ জিলাকো কণ্টেইমেন্ট জিলা হিচাপে ঘোষণা কৰা সন্দৰ্ভত পুণৰ বিবেচনা কৰাৰ বাবে ৰাজ্যৰ স্বাস্হ্য বিভাগক অনুৰোধ জনাইছে বিশ্বনাথবাসীয়ে।