শিশুৰ বাবে ভেড়া ছাগলীৰ সাধু লিখি প্ৰকাশ কৰাৰ বাবেই পাঁচ জনক গ্ৰেপ্তাৰ, ক’ত?

এখন গাঁৱত কেইটামান বৰ সাহসী ভেড়া ছাগলী আছিল। এদিন গাঁও খনত কেইটামান হিংস্ৰ জন্তুৱে আক্ৰমণ কৰিলে।

জন্তু কেইটাৰ চকুত ধূলি দি গাঁও খনৰ পৰা ১২ টা ভেড়া ছাগলীয়ে এখন নাঁৱত উঠি পলায়ন কৰিলে।

ঠিক এনেদৰেই আৰম্ভ হৈছিল ভেড়া ছাগলীৰ সাধু।কণ কণ শিশুৰ বাবে লিখা এনে কিছুমান সাধুৰ বাবেই এতিয়া হংকং প্ৰশাসনৰ ৰোষত পৰিছে পাঁচগৰাকীকৈ লোক।

গণতন্ত্ৰকামী শক্তিক বল প্ৰয়োগ কৰি দমাই ৰখা হংকঙত ভেড়া ছাগলীৰ সাধু লিখি গ্ৰেপ্তাৰ হোৱা লোকসকলৰ ভিতৰত দুগৰাকী পুৰুষ আৰু তিনিগৰাকী মহিলা। Guardians of Sheep Village শীৰ্ষক এলানি সচিত্ৰ গ্ৰন্থ প্ৰকাশ কৰাৰ বাবেই হংকং প্ৰশাসনে The General Union of Hong Kong Speech Therapists নামৰ সংস্থাটোৰ পাঁচগৰাকী সদস্যক গ্ৰেপ্তাৰ কৰে।

হংকং প্ৰশাসনৰ মতে এনে সাধুকথাৰ জৰিয়তে লোককেইজনে গণতন্ত্ৰকামী লোকসকলক উত্তেজিত কৰিব বিচাৰিছে। গণতন্ত্ৰৰ সমৰ্থন কৰা ১২ জন হংকঙৰ লোকে সাগৰেৰে নাঁৱত উঠি টাইৱানলৈ পলায়নৰ চেষ্টা কৰি চীনৰ উপকূলৰক্ষীৰ হাতত ধৰা পৰিছিল।

ভেড়াৰ সাধুৰ জৰিয়তে সেই ঘটনাটোকেই ফুটাই তুলিবলৈ চেষ্টা চলোৱা হৈছিল বুলি হংকং প্ৰশাসনে দাবী কৰিছে।

সেইবাবেই তেওঁলোকক ৰাষ্ট্ৰীয় নিৰাপত্তা আইনৰ অধীনত ৰাষ্ট্ৰদ্ৰোহৰ গোচৰত গ্ৰেপ্তাৰ কৰা হৈছে বুলি হংকং প্ৰশাসনে প্ৰকাশ কৰিছে।

উল্লেখ্য চীনৰ নিয়ন্ত্ৰণত থকা হংকঙত শেহতীয়াকৈ ৰাষ্ট্ৰীয় নিৰাপত্তা আইন বলৱৎ কৰি গণতন্ত্ৰ প্ৰতিষ্ঠাৰ বাবে যুঁজ দি থকাসকলৰ মুখ বন্ধ কৰাৰ চেষ্টা চলোৱা হৈছে।

সেয়ে সামান্য অচিলালৈয়ে হংকং প্ৰশাসনে বহুতকে গ্ৰেপ্তাৰ কৰিছে।