কালি অসম আৰু মিজোৰাম সীমান্তত সংঘটিত বিবাদ যদিও দেখাত সীমাকেন্দ্ৰিক আছিল তথাপি তাত ড্ৰাগছৰ কানেকশ্যন থাকিব পাৰে নেকি?
কিয়নো মুখ্যমন্ত্ৰীৰ কথাতো তাৰ গোন্ধ পোৱা গ’ল।
বিভিন্ন প্ৰসংগ উত্থাপন কৰি থকাৰ মাজতেই এগৰাকী সাংবাদিকে এই ঘটনাৰ সৈতে ড্ৰাগছৰ সৰবৰাহৰ কিবা সম্পৰ্ক থাকিব পাৰে নেকি বুলি প্ৰশ্ন কৰাত মুখ্যমন্ত্ৰীগৰাকীয়ে কয়, ‘বহুদিনৰ পৰা বহু দুষ্কাৰ্য্য চলি আছিল। বহু লোক আছে যি এতিয়াও ম্যানমাৰ চৰকাৰৰ বিৰুদ্ধে বিদ্ৰোহ কৰি আছে, তেওঁলোকে মিজোৰামত প্ৰৱেশ কৰিছে। তাৰে কিছু অংশ ডিমা-হাচাওলৈকে যাব বিচাৰিছিল। কিন্তু আমি বাধা দি ৰাখিলো।‘
মুখ্যমন্ত্ৰীগৰাকীয়ে গভীৰভাৱে সন্দেহ প্ৰকাশ কৰি কয় যে ‘মিজোৰাম হৈ ড্ৰাগছ পাৰ কৰি নিয়া এক পথ আছে। বৰাক উপত্যকা, মিজোৰাম আৰু অসমৰ যোগেদি সীমা পাৰ হৈ পঞ্জাৱলৈকে যায় আৰু মিজোৰামৰ মাজেদি বৰাক উপত্যকা হৈ অসমলৈ ড্ৰাগছৰ সৰবৰাহ হৈছিল। কিন্তু আমি ড্ৰাগছ সৰবৰাহৰ সেই যোগসূত্ৰডাল কাটি দিছো। আমি বৃহৎ পৰিমাণৰ ড্ৰাগছ জব্দ কৰিছো।‘
ইয়াৰোপৰি, দ্বিতীয়তে গৰু সৰবৰাহৰ বিৰুদ্ধে ৰাজ্য চৰকাৰে বিধানসভাত এখন আইন প্ৰস্তুত কৰিছিল বুলি উল্লেখ কৰি লগতে কয়, ‘যিটোৱে একাংশ লোকক বহুত ক্ষুব্ধ কৰি তুলিছে। কিন্তু মই এইটো আন্তঃৰাষ্ট্ৰীয় ষড়যন্ত্ৰ নহয় বুলি ভাবো।‘
কালিৰ ঘটনাটোৰ বাবে ড্ৰাগছ সৰবৰাহ আৰু গৰু সৰবৰাহ বন্ধ কৰাটোত এটা প্ৰশ্নবোধক থাকি গ’ল।
তেওঁ লগতে কয়, ‘ড্ৰাগছ আৰু গৰু মাংসৰ নাটনিৰ কথা মুখে মুখে শুনি আছে। এইবোৰেই একো একোটা কাৰণ যিটোৱে মিজোৰামৰ কিছু সাধাৰণ নাগৰিকক উচটনি যোগাইছে। সেইকাৰণে কিছুসংখ্যক নাগৰিকে হাতত অস্ত্ৰও লৈ থকা দেখিবলৈ পোৱা গৈছে। আশা কৰো, মিজো আৰক্ষীয়ে এই দিশটো ভালদৰে মনোযোগ দিব।‘
‘অসমত দুই-তিনিমাহ কিছুমান কথা চলি আছে যাৰ কিছুমান পৰিণাম আছে, সেয়েহে মিজোৰামৰ নাগৰিকসকলেও কালি অংশগ্ৰহণ কৰিছে বুলি সন্দেহ হয়।‘ শৰ্মাই সন্দেহ প্ৰকাশ কৰি কয়।
ইপিনে, ‘মই এইটোৱে কাৰক বুলি একেমুখে নকওঁ’ বুলি উল্লেখ কৰি মুখ্যমন্ত্ৰীগৰাকীয়ে কয় ‘কিন্তু এই ঘটনাৰ এক উচ্চস্তৰীয় তদন্তৰ প্ৰয়োজন আছে।‘
উল্লেখযোগ্য যে, ড্ৰাগছৰ বিৰুদ্ধে ব্যাপক অভিযান চলোৱা বৈভৱ চন্দ্ৰকান্ত নিম্বলকাৰ কালিৰ গুলিচালনাত গুৰুতৰভাৱে আহত হৈছিল। তেওঁৰ দেহত পাঁচটাকৈ গুলি লাগিছিল আৰু তেওঁক বৰ্তমান উন্নত চিকিৎসাৰ বাবে মুম্বাইৰ চিকিৎসালয়লৈ প্ৰেৰণ কৰা হৈছে।
নিম্বলকাৰে মুখ্যমন্ত্ৰীৰ ড্ৰাগছৰ বিৰুদ্ধে অভিযানৰ প্ৰতি পূৰ্ণ সঁহাৰি জনাই কাছাৰ জিলাৰ বিভিন্ন প্ৰান্তত ড্ৰাগছমুক্ত অসম গঢ় দিয়াৰ যাত্ৰাত অংশীদাৰ হৈছিল। কিন্তু কালিৰ ঘটনাটোত তেওঁৰ দেহত লগা পাঁচটাকৈ গুলীয়ে সমগ্ৰ বিষয়টো ৰহস্যৰ আৱৰ্তত সোমাই পৰাৰ লগতে সন্দেহৰ কিছু অৱকাশ ৰাখি গৈছে।
