গুৱাহাটীৰ সমীপৱৰ্তী ৰাণীত পুনৰ সংঘটিত হৈছে হাতী-মানুহৰ সংঘাতৰ ঘটনা। বনৰীয়া হাতীৰ আক্ৰমণত গুৰুতৰভাৱে আহত হৈছে এগৰাকী মহিলা। সোমবাৰ পুৱাৰ ভাগত ৰাণী বনাঞ্চলৰ অন্তৰ্গত উদয়পুৰ গাঁৱত সংঘটিত হয় এই ঘটনা।
প্ৰাপ্ত তথ্য অনুসৰি, ৰত্না কাকতি নামৰ মহিলাগৰাকীয়ে স্থানীয় যুৱক শ্ৰীকান্ত বড়োৰ সৈতে পুৱা খোজ কাঢ়িবলৈ ওলাই গৈছিল। সেই সময়তে হঠাৎ জোপোহাৰ আঁৰৰ পৰা ওলাই অহা এটা বনৰীয়া হাতীয়ে তেওঁলোকক আক্ৰমণ কৰিবলৈ খেদি আহে। হাতীটোৰ আক্ৰমণৰ পৰা হাত সাৰিবলৈ শ্ৰীকান্ত বড়োৱে পথৰ দাঁতিত থকা এটা কংক্ৰিটৰ নলাত আশ্ৰয় লয়। কিন্তু ৰত্না কাকতিক হাতীটোৱে আক্ৰমণ কৰাত তেওঁ গুৰুতৰভাৱে আহত হয়।
স্থানীয় ৰাইজে ততাতৈয়াকৈ মহিলাগৰাকীক ৰাণী সামূহিক স্বাস্থ্যকেন্দ্ৰলৈ লৈ যায়। অৱশ্যে তেওঁৰ অৱস্থা সংকটজনক হোৱাত উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হয়।
স্থানীয় লোকৰ মতে, অঞ্চলটোত বনৰীয়া হাতীৰ বিচৰণ আৰু জনবসতিপূৰ্ণ অঞ্চলত প্ৰৱেশৰ ঘটনা ক্ৰমাৎ বৃদ্ধি পাইছে। বনাঞ্চলৰ মাজত থকা হাতীৰ চলাচলৰ পথ সংকুচিত হৈ অহা আৰু ৰাণী-গৰভঙা কৰিডৰৰ বাসস্থান খণ্ডিত হোৱাৰ ফলত হাতী আৰু মানুহৰ মাজত সংঘাত বৃদ্ধি পোৱাৰ আশংকা প্ৰকাশ কৰিছে বন বিভাগৰ এগৰাকী বিষয়াই।
ইফালে, একে সময়তে গোৱালপাৰা জিলাৰ পূব গোৱালপাৰাৰ বিভিন্ন অঞ্চলতো বনৰীয়া হাতীৰ বৃহৎ জাকে তাণ্ডৱ চলোৱাৰ খবৰ পোৱা গৈছে। প্ৰায় ৪০টাৰো অধিক হাতীৰ জাকটোৱে মাটিয়া অঞ্চলৰ বাকাইটাৰী, ৰতনপুৰ, নিগাম আৰু সিদ্ধাবাৰী গাঁৱত প্ৰৱেশ কৰি বিস্তীৰ্ণ শালিধানৰ খেতি, শাক-পাচলিৰ বাগিচা আৰু বাসগৃহৰ ক্ষতিসাধন কৰে। হাতীৰ উপদ্ৰৱৰ ফলত কৃষক পৰিয়ালসমূহৰ মাজত আতংকৰ সৃষ্টি হৈছে।
বন বিভাগৰ কৰ্মচাৰীসকলে স্থানীয় ৰাইজৰ সহযোগত হাতীৰ জাকটোক জনবসতিপূৰ্ণ অঞ্চলৰ পৰা আঁতৰাই বনাঞ্চললৈ ঘূৰাই পঠিওৱাৰ চেষ্টা অব্যাহত ৰাখিছে। আনহাতে, হাতী-মানুহৰ সংঘাত ৰোধ কৰিবলৈ অঞ্চলটোত স্থায়ী নিৰীক্ষণ ব্যৱস্থা গঢ়ি তোলাৰ দাবী জনাইছে স্থানীয় বাসিন্দাসকলে।
ক্ৰমাগতভাৱে বৃদ্ধি পোৱা এনে ঘটনাই পুনৰ এবাৰ অসমৰ হাতী-মানুহৰ সংঘাতৰ সমস্যা আৰু ইয়াৰ স্থায়ী সমাধানৰ প্ৰয়োজনীয়তাক চৰ্চালৈ আনিছে।
