শিক্ষক দিৱস উপলক্ষে সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাৰ কেন্দ্ৰীয় সভানেত্রী হেমাঞ্জলী ভুঞা দত্ত আৰু সাধাৰণ সম্পাদক বসন্ত নেওগে ৰাজ্যখনৰ সকলো শিক্ষক-শিক্ষয়িত্রীক শুভেচ্ছা জ্ঞাপন কৰিছে।
তদুপৰি ৰাজ্যখনৰ বেতন বঞ্চিত প্ৰাথমিক শিক্ষকৰ দীর্ঘদীনিয়া সমস্যাৰাজি সমাধান কৰাৰ বাবে অসম চৰকাৰলৈ ধন্যবাদ আৰু কৃতজ্ঞতা জ্ঞাপন কৰিছে।
আনহাতে, উক্ত নিযুক্তি প্ৰক্ৰিয়াত ৰৈ যোৱা বিভিন্ন আসোঁৱাহৰ বাবে বহু যোগ্যতা সম্পন্ন শিক্ষক বৰ্তমানেও নিযুক্তি লাভৰ পৰা বঞ্চিত হৈ আছে। শিক্ষক দিৱসৰ পবিত্ৰ ক্ষণত শিক্ষক সন্থাই উক্ত সমস্যা সমূহ বিবেচনা তথা ৰৈ যোৱা আসোঁৱাহ সমূহ দূৰ কৰি অতি সোনকালে নিযুক্তি প্রদান কৰিবৰ বাবে চৰকাৰক অনুৰোধ জনাইছে।
ৰাজ্যখনৰ বেতন বঞ্চিত প্ৰাথমিক শিক্ষকৰ দীর্ঘদীনিয়া সমস্যাৰাজি সমাধান কৰি চলিত বর্ষৰ ৩০ জানুৱাৰীত গুৱাহাটীৰ খানাপাৰাত সেই সময়ৰ শিক্ষামন্ত্রী ডঃ হিমন্ত বিশ্ব শর্মাৰ উপস্থিতিত ৪৫১১ গৰাকী শিক্ষকক নিযুক্তি পত্ৰ প্ৰদান কৰিছিল । ইয়াৰ ভিতৰত (বুনিয়াদী প্ৰশিক্ষণপ্ৰাপ্ত) ১৫৬৬ জনক শিক্ষক পদত আৰু ২৯৪৫ জনক টিউটৰ হিচাবে নিযুক্তি প্রদান কৰিছিল ।
নিযুক্তি প্ৰক্ৰিয়াত ৰৈ যোৱা বিভিন্ন আসোঁৱাহৰ বাবে বহু প্ৰশিক্ষণপ্ৰাপ্ত শিক্ষকে টিউটৰ হিচাবে নিযুক্তি লাভ কৰাৰ বিপৰীতে প্ৰশিক্ষণ নথকা আন একাংশ শিক্ষকে শিক্ষক পদত নিযুক্তি লাভ কৰিলে। যাৰ বাবে তেওঁলোকৰ সমস্যা বৰ্তমানেও সমাধান হোৱা নাই ।
পূৰ্বে ২০১২/১৬ চনলৈকে সম্পূর্ণ হাৰত দৰমহা লাভ কৰা আৰু বুনিয়াদী প্ৰশিক্ষণপ্ৰাপ্ত শিক্ষকো বিভিন্ন আসোঁৱাহৰ বাবে নিযুক্তি লাভৰ পৰা বঞ্চিত হৈ আছে ।
নিযুক্তি বিতৰণ অনুষ্ঠানত সেই সময়ৰ শিক্ষামন্ত্রী তথা বৰ্তমানৰ মুখ্যমন্ত্রী ডঃ হিমন্ত বিশ্ব শর্মাই নিযুক্তি প্ৰক্ৰিয়াত ৰৈ যোৱা আসোঁৱাহ সমূহ দূৰ কৰিবৰ বাবে এক অনলাইন পৰ্টেল প্ৰস্তুত কৰি ৪৫ দিনৰ ভিতৰত সমস্যা সমাধানৰ আশ্বাস প্রদান কৰিছিল। কিন্তু বৰ্তমানলৈকে সমাধান নোহোৱাত শিক্ষক সমাজ বৰ্তমানেও অধীৰ আগ্রহেৰে অপেক্ষা কৰি আছে ।
সেইদৰে এসময়ত চৰকাৰীভাৱে নিযুক্তি লাভ কৰা শিক্ষকসকলৰ নিযুক্তি ক্ষেত্রতো বিবেচনা কৰিব বুলি ৰাজহুৱা প্ৰতিশ্ৰুতি প্ৰদান কৰিছিল, গতিকে তেওঁলোক আজি আশাবাদী ।
ইয়াৰোপৰি বহু শিক্ষক বিনা বেতনেৰে অৱসৰ গ্রহণ কৰাৰ লগতে বহু সংখ্যক শিক্ষক চাকৰি নিয়মীয়াকৰণৰ আশা বুকুত বান্ধিয়েই মৃত্যুবৰণ কৰিলে, তেওঁলোকৰ পৰিয়াল সমূহেও চৰকাৰলৈ এক আশাৰে বাট চাই আছে ।
গতিকে তেওঁলোকৰ ক্ষেত্ৰতো চৰকাৰক বিবেচনা কৰিবৰ বাবে বিনম্ৰ গোহাৰি জনাইছে সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাই ।
