মানুহ জনৰ কোনো অৱয়ৱ নাই, নাই কোনো অস্তিত্ব।
এনে এগৰাকী অস্তিত্বহীন লোককেই সভাপতি হিচাবে মানিলৈ এটা সময়ত চলাই নিয়া হৈছিল জন্ম লগ্নৰে পৰা স্বাধীনতাৰ দাবী কৰি অহা বিদ্ৰোহী সংগঠন আলফা (স্বাধীন)।
এই কথা নিজ মুখে স্বীকাৰ কৰিছে আলফাৰ সভাপতি পৰেশ বৰুৱাই।
এটা ছেটেলাইট টেলিভিছনত দিয়া এক সাক্ষাৎকাৰত পৰেশ বৰুৱাই বহু দিনে গোপনে থকা এই সত্যটো পোহৰলৈ আনিছে।
সাক্ষাৎকাৰটোত পৰেশ বৰুৱাই কৈছে ‘আলফা (স্বাঃ)ৰ পূৰ্বৰ সভাপতি অভিজিৎ অসম এক কাল্পনিক চৰিত্ৰ। এয়া কেৱল আমাৰ এক ৰণকৌশল আছিল’।
উল্লেখ্য অসমৰ স্বাধীনতাৰ দাবীত দশকৰ পিছত দশক ধৰি অটল হৈ থকা আলফা (স্বাধীন)ত ২০১১ চনৰ পৰা সভাপতিৰ পদত অধিষ্ঠিত হৈ আছিল অভিজিৎ অসম।কিন্তু বাস্তৱিকতে অভিজিত অসমৰ কোনো অস্তিত্বই নছিল।
আলফাৰ সভাপতি পৰেশ বৰুৱাই ছেটেলাইট চেনেলটোত দিয়া সাক্ষাৎকাৰত লগতে এইবুলি কৈছে যে অভিজিৎ অসমৰ নামত যিবোৰ আলোকচিত্ৰ উপলব্ধ হৈ আহিছিল সেয়া ডাঃ মুকুল হাজৰিকাৰহে ফটো আছিল।
পৰেশ বৰুৱাৰ এনে দাবীৰ মাজতে এইবুলিও আলোচনা হৈছে যে ডাঃ মুকুল হাজৰিকাই অভিজিৎ অসম বুলি বহু দিন পূৰ্বে একাংশ লোকে সন্দেহ ব্যক্ত কৰিছিল।
কিন্তু সেই সময়ত আলফাৰ তৰফৰ পৰা এই সন্দৰ্ভত কোনো মন্তব্য কৰা হোৱা নাছিল।
ডাঃ মুকুল হাজৰিকাই পত্নী গুৰুতৰ ৰোগত আক্ৰান্ত হোৱাৰ পিছতে আলফাৰ পৰা আঁতৰি আহিছিল।
