গুৱাহাটীৰ পাণ্ডু ৰে’লৱে বজাৰৰ এগৰাকী ক্ষুদ্ৰ মিঠাই বিক্ৰেতা বিমল দাসৰ বাবে আজিৰ দিনত সচৰাচৰ দিনবোৰৰ দৰে নাছিল।
গণেশ চতুৰ্থী উপলক্ষে প্ৰভু গণেশক আগবঢ়াবলৈ এটা ‘৫কেজি ওজনৰ লাড্ডু’ প্ৰস্তুত কৰাৰ এক বিশেষ দায়িত্ব লাভ কৰিছিল বিমলে।
‘’মই কালি সন্ধিয়াৰে পৰা এইটো প্ৰস্তুত কৰাৰ বাবে ব্যস্ত হৈছিলো আৰু এতিয়া ই সম্পূৰ্ণ হৈছে। আমাৰ সকলোৰে মংগলৰ বাবে বাবাক ৫কেজি ওজনৰ লাড্ডুটো আগবঢ়োৱা হ’ব,’’-বিমলে কয়।
কিন্তু মহানগৰীৰৰ পাণ্ডু ইনষ্টিটিউট ক’লনি অঞ্চলৰ সেন পৰিয়ালৰ বাবে এই ‘লাড্ডু’ কোভিড অতিমাৰীয়ে জোকাৰি যোৱা অসমত এক বিশেষ তাৎপৰ্য আছে।
কোভিড-১৯ অতিমাৰীয়ে কেবল ক্ষতিগ্ৰস্ত কৰাই নহয় লগতে বিগত দুবছৰত বহুতৰ জীৱন বিপৰ্যস্ত কৰিছে।
শেহতীয়াকৈ পৰিস্থিতিৰ কিছু উন্নতি হৈছে যদিও এতিয়াও মহানগৰীৰ ব্যৱসায়ীসকলৰ বাবে কোভিড বিধি পালন কৰি চলাটো এক বৃহৎ প্ৰত্যাহ্বান হৈ পৰিছে কিয়নো বহু মানুহে এতিয়াও সুৰক্ষা বিধি উলংঘা কৰিছে।
‘’এই অতিমাৰীয়ে যোৱা দুটা বছৰত আমাৰ জীৱন বিধ্বস্ত কৰিলে। সেয়ে, সকলোৰে মংগলৰ বাবে আমাৰ সেন পৰিয়ালে বাবাক এই ‘৫কেজিৰ লাড্ডু’ আগবঢ়াইছে যাতে সকলোৰে শান্তি তথা সমৃদ্ধি ঘটে,’’-ৰতন কুমাৰ সেনে কয়।
বিমল কুমাৰ দাসেই হওক, বা ৰতন কুমাৰ সেনেই হওক প্ৰতিটো পূজা মণ্ডপত কাহিনীটো প্ৰায় একেই।
২০২১ৰ উৎসৱৰ সময়ছোৱা গণেশ চতুৰ্থীৰে আৰম্ভ হোৱাৰ লগে লগে মানুহে আশা কৰিছে যে ‘বাবা’ই কোভিড-১৯য়ে ক্ষতিগ্ৰস্ত কৰা বিশ্বত এক সমৃদ্ধিৰ আৰম্ভণি ঘটাই সমাজৰ পৰা সকলো অপায়-অমংগল দূৰ কৰিব।
