ৰাজ্য জুৰি বেংক প্ৰৱঞ্চনা চলাই থকা তিনি দুর্ধৰ্ষ প্ৰৱঞ্চকক গ্ৰেপ্তাৰ কৰিলে গোলাঘাট আৰক্ষীয়ে। প্ৰৱঞ্চক তিনিটা হ’ল ক্রমে চায়িদ আহমেদ লস্কৰ, নুৰ আহমেদ বৰভূঞা আৰু মতিবুৰ ৰহমান চৌধুৰী।
ইয়াৰে দুজনক গুৱাহাটী আৰু এজনক হোজাইৰ পৰা গ্ৰেপ্তাৰ কৰে গোলাঘাট আৰক্ষীয়ে।
উল্লেখযোগ্য যে গোলাঘাটৰ এখন মহাবিদ্যালয়ৰ অধ্যক্ষৰ বেংক একাউণ্টৰ পৰা ১৩ লাখ টকা হৰলুকী কৰিছিল এই তিনি অপৰাধীয়ে।
এ টি এমত পইচা উলিওৱাৰ সময়ত কৌশলেৰে এটিএম কাৰ্ডৰ জৰিয়তে প্ৰৱঞ্চনা আৰম্ভ কৰিছিল প্ৰৱঞ্চকৰ দলটোৱে। অধ্যক্ষজনৰ একাউন্ট পৰা অনলাইন যোগে বেংকৰ পৰা ১৩ লাখ টকা হৰলুকী কৰি বিভিন্ন অনলাইন চাইটত অনলাইন শ্বপিং কৰিছিল প্ৰৱঞ্চক কেইটাই।
অধ্যক্ষ গৰাকীৰ ধন হৰলুকী গোচৰৰ ভিত্তিত গোলাঘাট আৰক্ষীয়ে তদন্ত চলাই এই দুৰ্ধৰ্ষ প্ৰৱঞ্চক কেইটাক গ্ৰেপ্তাৰ কৰিবলৈ সক্ষম হয় ।
প্ৰৱঞ্চক কেইটাৰ ঘৰ হোজাই জিলাত বুলি আৰক্ষীয়ে জানিব দিয়ে। এই প্ৰৱঞ্চক কেইটাৰ লগত বহিৰ্ৰাজ্যৰ প্ৰৱঞ্চকৰ সম্পৰ্ক থকা বুলি জানিব দিছে গোলাঘাট আৰক্ষীয়ে।
প্ৰৱঞ্চক কেইটাৰ পৰা এখন FORD কোম্পানীৰ বিলাসী গাড়ী, বহুতো মোবাইল ফোন, বেংক পাছবুক, লেপটপ, ৫৯ খন ডেবিট কাৰ্ড, ছিমকাৰ্ডৰ লগতে বহুতো আপত্তিজনক নথি পত্ৰ জব্দ কৰে আৰক্ষীয়ে।
ইতিমধ্যে ঘটনাৰ সন্দৰ্ভত আৰক্ষীয়ে অধিক তথ্যৰ বাবে সোধ-পোছ আৰম্ভ কৰিছে।
প্ৰৱঞ্চক কেইটাৰ পৰা আৰক্ষীয়ে বৰ্ত্তমান পৰ্যন্ত ৩ লাখ টকা উদ্ধাৰ কৰিবলৈ সক্ষম হয়। ৰাজ্যজুৰি প্ৰৱঞ্চনাৰ জাল মেলিছিল প্ৰৱঞ্চক কেইটাই।
