দুধনৈ পুনৰ বৃহৎ পৰিমানৰ ড্ৰাগছ উদ্ধাৰ কৰা হৈছে। সোমবাৰে সন্ধিয়া প্ৰায় সাত মান বজাত গোপন তথ্যৰ ভিত্তিত দুধনৈ আৰক্ষী থানাৰ সন্মুখত NL07-T- 0815 নম্বৰৰ উইংগাৰ গাড়ীক সন্দেহবশত দুধনৈ আৰক্ষী থানাৰ ভাৰপ্ৰাপ্ত আৰক্ষী বিষয়া দুলাল মহন্তই আটক কৰি থানালৈ লৈ আনি তালাচী চলায়।
আৰক্ষীয়ে তালাচীত গাড়ীখনৰ পৰা বৃহৎ সংখ্যক ড্ৰাগছ, ২৫৬গ্ৰাম হেৰইন, চল্লিশ হেজাৰৰো অধিক য়াবা টেবলেট, চিৰিঞ্জ ইত্যাদি উদ্ধাৰ কৰে। লগতে তিনিগৰাকী ড্ৰাগছ সৰবৰাহকাৰীক আৰক্ষীয়ে আটক কৰে৷
আৰক্ষীয়ে মানকাচৰৰ ফকিৰুল ইছলাম(৩৩), নাগালেণ্ড ডিমাপুৰৰ ইমলিয়াকুন লং কুমাৰ(৩৬) আৰু মণিপুৰৰ নংবাৰ থেনচুংনাগ চিংচন(৩৪)নামৰ ড্ৰাগছ সৰবৰাহকাৰী কেইজনক আটক কৰে৷
উইংগাৰ গাড়ীখন ডিমাপুৰৰ পৰা মানকাচৰ অভিমুখে আহি আছিল৷ বাহনখনৰ পৰা উদ্ধাৰ হোৱা ড্ৰাগছ খিনিৰ মূল্য প্ৰায় আঢ়ৈ কোটি টকাৰ ওপৰত হব বুলি অনুমান কৰা হৈছে৷
