বিশ্ব গঁড় দিৱসৰ দিনাই অসম চৰকাৰৰ উদ্যোগত এক ‘উৎসৱ’ অনুষ্ঠিত কৰা হ’ল।
যি এশিঙীয়া গঁড়ৰ বাবে অসম আজি বিশ্বত পৰিচিত সেই গঁড়ৰেই দুই সহস্ৰাধিক খৰ্গ আজি সম্পূৰ্ণ চৰকাৰী উদ্যোগত জ্বলাই দিয়া হ’ল।
চৰকাৰে ৰাজকোষৰ ধন ব্যয় কৰি গঁড়ৰ খৰ্গ জ্বলোৱা অনুষ্ঠানত ভাৰতীয় সংবিধানৰ ধৰ্ম নিৰপেক্ষতাৰ বিষয়টোক অংগুষ্ঠ প্ৰদৰ্শন কৰি বৈদিক নীতিৰে কৰা হ’ল পূজা-পাঠ।
কেৱল সেয়াই নহয়, ২১ জন পুৰোহিতৰ দ্বাৰা মুখ্যমন্ত্ৰী হিমন্ত বিশ্ব শৰ্মাৰ উপস্থিতিত বৈদিক পৰম্পৰাৰে মৃত গঁড়ৰ আত্মাৰ সদগতিৰ বাবে পূজা-পাঠ কৰা হয়।
মুখ্যমন্ত্ৰী হিমন্ত বিশ্ব শৰ্মাই ‘মুখাগ্নি’ কৰাৰ পিছতে জ্বলাই দিয়া হয় ২৪৭৯টা খৰ্গ। ইয়াৰ মাজতে এটা অঘটনো ঘটি যায়।
মুখ্যমন্ত্ৰীয়ে যি খন দ্ৰোনেৰে গঁড়ৰ খৰ্গ জ্বলাই দিয়া চিতাত অগ্নি সংযোগ কৰিছিল সেই চিতা খনেই ভুল পৰিচালনাৰ বাবে চিতাত পৰি যায় আৰু সম্পূৰ্ণ ৰূপে ভষ্মীভূত হয়।
দিল্লীৰ পৰা অনা সেই দ্ৰোন খনৰ মূল্য কেইবালাখ টকা হ’ব বুলি জানিব পৰা গৈছে।
চিতাত গঁডৰ খৰ্গৰ সৈতে ভুল পৰিচালনাৰ বাবে একেলগে জ্বলি যোৱা দ্ৰোন খনৰ দাম এতিয়া মুখ্যমন্ত্ৰীৰ নিজৰ পুজিৰ পৰা কটা হ’ব নে সাধাৰণ জনতাৰ পৰা আদায় কৰা হ’ব তাকেলৈয়ো মানুহৰ মাজত প্ৰশ্নৰ উদয় হৈছে।
বিশ্ব গঁড় দিৱসৰ দিনাই এনেদৰে অসমৰ গৌৰৱ এশিঙীয়া গঁড়ৰ খৰ্গ জ্বলাই মুখ্যমন্ত্ৰী হিমন্ত বিশ্ব শৰ্মাকে ধৰি চৰকাৰ তথা গেৰুৱা বাহিনীৰ বহুতে আত্ম সন্তুষ্টি লভিছে যদিও এনে কাৰ্যক মুঠেও বিবেচক কাৰ্য বুলি মানি ল’ব বিচৰা নাই বহুতে।
চৰকাৰী কাৰ্যসূচীত পুৰোহিতৰ দ্বাৰা পূজা-পাঠ আদিৰ দৰে ঘটনাক বহুতে ধিক্কাৰ দিয়াৰ লগতে বিশ্ব গঁড় দিৱসৰ দিনাই গঁড়ৰ খৰ্গ খিনি সংৰক্ষণৰ দিহা কৰাৰ পৰিৱৰ্তে জ্বলাই দিয়াৰ কথাটোও বহুতে সহজ ভাবে ল’ব পৰা নাই।
অসমত এতিয়া চোৰাং চিকাৰীৰ দৌৰাত্মৰ বাবে গঁড় সমূহ অস্তিত্বৰ সংকটত ভুগিছে। চৰকাৰে গঁড়ৰ সুৰক্ষা দিয়াত কোনোপধ্যে সফল হোৱা বুলি আজিলৈকে দাবী কৰিব পৰা হোৱা নাই।
গঁড়ৰ খৰ্গৰ চোৰাং বেহাৰ সৈতে আনকি বন বিভাগৰেই কৰ্মচাৰীও জৰিত হৈ থকাৰ কথা একাধিক বাৰ পোহৰলৈ আহিছে।
এনে পৰিস্থিতিত কলৰ সোঁতত এদিন হয়তো অসমৰ এশিঙীয়া গঁড়ৰ কেৱল ছবিতহে জীয়াই থাকিবগৈ।
চৰকাৰে কেইবা দশক ধৰি ৰাজ্যৰ কেইবাটাও কোষাগাৰত সংৰক্ষণ কৰি ৰখা গঁড়ৰ খৰ্গসমূহ জ্বলাই দিয়াৰ সলনি যদি বিজ্ঞানসন্মতভাবে সংৰক্ষণৰ ব্যৱস্থা কৰিলেহেঁতেন তেন্তে সেয়া নতুন পুৰুষৰ লগতে দেশ-বিদেশৰ পৰ্যটকৰ বাবেও এক আকৰ্ষণৰ সমল হ’লহেঁতেন।
ইয়াকে নকৰি চৰকাৰে জব্দ অথবা উদ্ধাৰ কৰা গঁড়ৰ খৰ্গসমূহ চৰকাৰী ধন খৰচ কৰি পূজা-পাঠৰ মাজেৰে জ্বলাই দিয়াৰ কথাটো কোনোপধ্যে সহজভাবে ল’ব পৰা বিষয় নহয়।
মুখ্যমন্ত্ৰী হিমন্ত বিশ্ব শৰ্মাই দ্ৰাগছ জ্বলাই দিয়া কাৰ্যৰ সৈতে গঁড়ৰ খৰ্গ জ্বলাই দিয়া কাৰ্যক ৰিজাব বিচাৰিছে যদিও সেয়াও সমৰ্থন যোগ্য কথা নহয়।
দ্ৰাগছ জ্বলাই নিদি সংগ্ৰহালয়ত সংৰক্ষণ কৰিলে সেয়া নৱপ্ৰজন্মৰ বাবে হঠকাৰী পদক্ষেপ হ’লহেঁতেন যদিও গঁড়ৰ খৰ্গ সংগ্ৰহালয়ত সংৰক্ষণ কৰিলে তাৰ পৰা নৱপ্ৰজন্মকে ধৰি সমাজৰ সকলো শ্ৰেণীৰ লোক উপকৃতহে হ’লহেঁতেন।
সেই খৰ্গ কেইটা সংৰক্ষণ কৰিবলৈ অসমত ইমানেই ঠাইৰ অভাৱ হ’ল নে? চৰকাৰে কেৱল চমক সৃষ্টিৰ বাবেই এনেদৰে বহু আপুৰুগীয়া সম্পদ জ্বলাই ধ্বংস কৰাৰ বিষয়টোক বহুতেই সহজ ভাবে ল’ব পৰা নাই।
কিছুদিন পূৰ্বে গঁড়ৰ খৰ্গ পৰীক্ষা কৰোতে খৰ্গৰ ঠাইত বহু কেইটা বাঁহৰ মূঢ়াহে ওলাইছিল।
অৰ্থাৎ আচল খৰ্গ হৰলুকি কৰি তাৰ ঠাইত কোষাগাৰত বাঁহৰ মূঢ়া থৈ দিয়া হৈছিল। চৰকাৰী কৰ্মাচাৰীক বাদ দি এনে কাম কোনেও কৰিব নোৱাৰে।কিন্তু চৰকাৰে গঁড়ৰ খৰ্গ হৰলুকি কৰা তেনে চৰকাৰী কৰ্মচাৰীৰ বিৰুদ্ধে আজিলৈকে কিবা ব্যৱস্থা গ্ৰহণ কৰিছেনে? সেই বিষয়ে চৰকাৰ নিমাত।
আজি জ্বলাই দিয়া গঁড়ৰ খৰ্গসমূহৰ ভিতৰতো যে বাঁহৰ মূঢ়া নাথাকিব তাৰ কি নিশ্চিতি আছে বুলিও সেয়ে বহুতৰে মাজত আলোচনা হোৱা দেখা গৈছে।
নে কোনোৱা বিশেষ চৰকাৰী বিষয়াক ৰক্ষণাবেক্ষণ দিয়াৰ বাবেই বাঁহৰ মূঢ়াকে গঁড়ৰ খৰ্গ বুলি জ্বলাই দিয়া হ’ল? মুখ্যমন্ত্ৰীয়ে পূৰ্বে প্ৰমাণ হোৱা বাঁহৰ মূঢ়াৰ প্ৰসংগটো সন্দৰ্ভত অৱগতনে?
এনেবোৰ প্ৰশ্নই এতিয়া সচেতন মহলৰ মাজত ব্যাপক চৰ্চা লাভ কৰা দেখা গৈছে। সামাজিক মাধ্যমতো গঁড়ৰ খৰ্গ জ্বলাই দিয়াৰ বাবে চৰকাৰ কটু সমালোচনাৰ সন্মুখীন হোৱা দেখা গৈছে।
গঁড়ৰ খৰ্গৰ ক্ষেত্ৰত মানুহৰ মাজত যিবোৰ অন্ধবিশ্বাসে গা কৰি উঠিছে তাৰ কোনো ভিত্তি নাই বুলি মুখ্যমন্ত্ৰী হিমন্ত বিশ্ব শৰ্মাই কৰা মন্তব্য সমৰ্থনযোগ যদিও গঁড়ৰ খৰ্গ জ্বলাই দিয়াৰ জৰিয়তে গঁড় হত্যাৰ বিৰুদ্ধে কেনেদৰে সজাগতাৰ সৃষ্টি হ’ব সেয়াহে ভাবিবলগীয়া কথা।
হয়, মুখ্যমন্ত্ৰী কোৱাৰ দৰেই গঁড়ৰ খৰ্গৰ কোনো মূল্য নাই। কিন্তু সেই খৰ্গটোৰ বাবেই দেশ-বিদেশৰ পৰ্যটকে অসমলৈ আহে গঁড় চাবলৈ।
মূল্য নাথাকিল বুলিয়েই সেয়া জ্বলাই দিব লাগিব তাৰো কোনো অৰ্থ নাই। জ্বলাই দিয়া গঁড়ৰ খৰ্গ খিনিৰ অৰ্থনৈতিক মূল্য নাথাকিলেও সামাজিক,শৈক্ষিক আদি মূল্য হয়তো বহু পৰিমাণে আছিল।যি মূল্যক আজি জ্বলাই ধ্বংস কৰা হ’ল।
