নিমাতী ঘাটৰ মৰ্মান্তিক ফেৰী দুৰ্ঘটনাত মৃত্যু হোৱা পৰমিতা দাসৰ মাতৃয়ে অসম চৰকাৰ তথা আইনী ব্যৱস্থাৰ ওপৰত প্ৰশ্ন উত্থাপন কৰিছে।
“সিহঁতে মোৰ ছোৱালী জনীক হত্যা কৰিলে। তাৰ পাছতো সিহঁতে কেনেকৈ জামিন পালে? আপোনালোকে কোৱা ন্যায় এয়াই নেকি?নিহতৰ প্ৰতি এনেকৈয়ে চৰকাৰে ন্যায় প্ৰদান কৰিলে নেকি” – আজি নিমাতী কাণ্ডৰ অভিযুক্তৰ জামিন প্ৰসঙ্গত এইদৰে প্ৰশ্ন উত্থাপন কৰে নিহত পৰমিতা দাসৰ মাতৃয়ে।
অভিযুক্ত সকলৰ ভুলৰ বাবেই পৰমিতা দাসৰ মৃত্যু হোৱা বুলি অভিযোগ কৰি তেওঁ কয় যে বিপৰীত দিশৰ পৰা আন এখন ফেৰী আহি থকা বুলি জনাৰ পিছতো এই ভয়ংকৰ দুৰ্ঘটনাটো সংঘটিত হৈছে। ফেৰী খনৰ তত্বাৱধানত থকা কৰ্মচাৰীসকলে এই ভুল নকৰা হ’লে পৰমিতা দাসৰ মৃত্যু ন’হলহেঁতেন।
উল্লেখ্য যে, নিমাতী ঘাটৰ ফেৰী দুৰ্ঘটনাৰ ফলত পৰমিতা দাসৰ লগতে বিক্ৰমজিত বৰুৱা আৰু ইন্দেশ্বৰ বৰুৱাৰ মৃত্যু হৈছিল।
ঘটনাটোৰ পিছত শনিবাৰে দুৰ্ঘটনাত পতিত মা কমলা নামৰ জাহাজ খনৰ স্বত্বাধিকাৰী পানী ৰাম কলিতাকে ধৰি ছয়জন ব্যক্তিক শনিবাৰে আটক কৰিছিল। লগতে অন্তৰ্দেশীয় জল পৰিবহন বিভাগৰ সাত জন কৰ্মচাৰীকো আটক কৰিছিল আৰক্ষীয়ে।
কিন্তু যোৱা মঙ্গলবাৰে যোৰহাট জিলা আদালতে অভিযুক্ত আটাইকেইজন ব্যক্তিৰে জামিন প্ৰদান কৰিছিল।
তেওঁলোকে জামিন লাভ কৰাৰ পাছতে চৰকাৰলৈ ন্যায়ৰ প্ৰসঙ্গত এইদৰে প্ৰশ্ন উত্থাপন কৰে নিহত পৰমিতা দাসৰ মাতৃয়ে।
