সোমবাৰে কেন্দ্ৰৰ তিনিখন কৃষি আইনৰ বিৰুদ্ধে কৃষক সংগঠনসমূহে আহ্বান কৰা ভাৰত বন্ধৰ পৰিপ্ৰেক্ষিতত দিল্লী আৰক্ষীয়ে ৰাষ্ট্ৰীয় ৰাজধানীৰ সীমান্ত অঞ্চলসমূহত নিৰাপত্তা বৃদ্ধি কৰিছে।
কৃষক আন্দোলনৰ নেতৃত্ব দিয়া ৪০ টাতকৈও অধিক কৃষক সংস্থাযুক্ত সংযুক্ত কিষাণ মৰ্চা নামৰ সংস্থাটোৱে ইয়াৰ পূৰ্বে ৰাইজক বন্ধত যোগদান কৰিবলৈ আহ্বান জনাইছিল।
কিষাণ মৰ্চাই এক বিবৃতিত কয়, “এই ঐতিহাসিক সংগ্ৰাম ১০ মাহ সম্পূৰ্ণ হোৱাৰ লগে লগে এছকেএমে সোমবাৰে কৃষক বিৰোধী মোদী চৰকাৰৰ বিৰুদ্ধে ভাৰত বন্ধ হিচাপে পালন কৰিবলৈ আহ্বান জনাইছে।”
“ কৃষাণ মৰ্চাই প্ৰতিজন ভাৰতীয়ক এই দেশব্যাপী আন্দোলনত যোগদান কৰিবলৈ আৰু ভাৰত বন্ধক এক সফলতা প্ৰদান কৰিবলৈ অনুৰোধ জনাইছে। বিশেষকৈ আমি শ্ৰমিক, ব্যৱসায়ী, পৰিবহনকাৰী, ব্যৱসায়ী, শিক্ষাৰ্থী, যুৱ আৰু মহিলা আৰু সকলো সামাজিক আন্দোলনৰ সংগঠনক সোমবাৰে কৃষকসকলৰ সৈতে একাত্মতা বঢ়াবলৈ অনুৰোধ জনাইছো।”- বিবৃতিটোত এইদৰে কোৱা হৈছে।
সোমবাৰে পুৱা ৬ বজাৰ পৰা আবেলি ৪ বজালৈ বন্ধ পালন কৰা হ’ব। এই সময়ছোৱাত সকলো চৰকাৰী আৰু ব্যক্তিগত কাৰ্যালয়, শৈক্ষিক আৰু অন্যান্য প্ৰতিষ্ঠান, দোকান, উদ্যোগ আৰু বাণিজ্যিক প্ৰতিষ্ঠানৰ লগতে সমগ্ৰ দেশতে ৰাজহুৱা অনুষ্ঠান আৰু ব্যক্তিগত অনুষ্ঠান সমুহ বন্ধ থাকিব।
অৱশ্যে বন্ধৰ সময়ছোৱাত চিকিৎসালয়, দৰৱৰ দোকান, সাহায্য আৰু উদ্ধাৰমূলক কাম আৰু ব্যক্তিগত জৰুৰীকালীন অৱস্থাত উপস্থিত থকা লোকসকলকে ধৰি সকলো জৰুৰীকালীন প্ৰতিষ্ঠান আৰু অত্যাৱশ্যকীয় সেৱাক ৰেহাই দিয়া হ’ব।
এজন জ্যেষ্ঠ আৰক্ষী বিষয়াই জনোৱা মতে বন্ধৰ সময়ত এক শৃংখলাবদ্ধ পৰিস্থিতি বজাই ৰাখিবলৈ আৰু বন্ধৰ সময়ত ৰাষ্ট্ৰীয় ৰাজধানীত যিকোনো অপ্ৰীতিকৰ ঘটনা প্ৰতিহত কৰিবলৈ পৰ্যাপ্ত নিৰাপত্তা ব্যৱস্থা কৰা হৈছে।
ইতিমধ্যে আৰক্ষীৰ টহল তীব্ৰতৰ কৰা হৈছে। বিশেষকৈ সীমান্ত অঞ্চলৰ ওপৰেৰে অতিৰিক্ত কৰ্মচাৰী মোতায়েন কৰা হৈছে আৰু ৰাষ্ট্ৰীয় ৰাজধানীত প্ৰৱেশ কৰা প্ৰতিখন বাহনৰ পুংখানুপুংখ পৰীক্ষা কৰা হৈছে।
নতুন দিল্লীৰ আৰক্ষী উপায়ুক্ত দীপক যাদৱে কয়, “ভাৰত বন্ধৰ প্ৰতি লক্ষ্য ৰাখি সতৰ্কতামূলক ব্যৱস্থা হিচাপে পৰ্যাপ্ত নিৰাপত্তা ব্যৱস্থা কৰা হৈছে। সীমান্ত অঞ্চলত পহৰাদাৰী শক্তিশালী কৰা হৈছে আৰু ইণ্ডিয়া গেট আৰু বিজয় চককে ধৰি সকলো গুৰুত্বপূৰ্ণ স্থানত পৰ্যাপ্ত নিয়োজন আছে।”
বিষয়াজনে লগতে কয় যে চহৰখনৰ সীমাত থকা তিনিটা প্ৰতিবাদস্থলীৰ পৰা কোনো প্ৰতিবাদকাৰীক দিল্লীত প্ৰৱেশ কৰিবলৈ অনুমতি দিয়া হোৱা নাই।
স্মৰ্তব্য যে, যোৱা বছৰৰ নৱেম্বৰৰ পৰা দেশৰ বিভিন্ন প্ৰান্তৰ কৃষকসকলে বিশেষকৈ পঞ্জাৱ, হাৰিয়ানা আৰু পশ্চিম উত্তৰ প্ৰদেশৰ কৃষকসকলে কেন্দ্ৰীয় চৰকাৰে প্ৰৱৰ্ত্তন কৰা তিনিখন বিতৰ্কিত কৃষি আইন বাতিল কৰাৰ দাবীত দিল্লীৰ সীমাত প্ৰতিবাদ কৰি আহিছে।
কিন্তু চৰকাৰে তিনিওখন আইনক মুখ্য কৃষি সংস্কাৰ হিচাপে প্ৰক্ষেপ কৰি আহিছে আৰু প্ৰতিবাদকাৰী কৃষকসকলৰ দাবীলৈ কোনো ভ্ৰুক্ষেপ কৰা নাই। দুয়ো পক্ষৰ মাজত ১০ টাতকৈও অধিক পৰ্যায়ৰ আলোচনা হৈছে যদিও কৃষি আইন বাতিল নকৰা পৰ্যন্ত কৃষক সকলে প্ৰতিবাদ অব্যাহত ৰাখিব বুলি জানিবলৈ দিছে।
