APDCLৰ নিযুক্তি কেলেংকাৰীয়ে জোকাৰি গৈছে সমগ্ৰ ৰাজ্যকে। এনে সময়তে APDCLৰ নিযুক্তি কেলেংকাৰীৰ মূল অভিযুক্ত আতাউৰ ৰহমানে মুখ্যমন্ত্রীৰ বিশেষ তদাৰকী কোষৰ ওচৰত আত্মসমৰ্পন কৰিছে।
আত্মসমৰ্পনৰ পিছতে আতাউৰ ৰহমানক আৰক্ষীয়ে গ্ৰেপ্তাৰ কৰে।উল্লেখ্য আতাউৰ ৰহমান APDCL ৰ মহাপ্ৰৱন্ধক।
ৰহমানৰ বিৰুদ্ধে কেলেংকাৰীত জৰিত থকাৰ অভিযোগ উঠাৰ পিছতে বিষয়াগৰাকীয়ে কাৰ্বি লাংপি অঞ্চলত আত্মগোপন কৰিছিল বুলি বিশেষ সূত্ৰে জানিব পৰা গৈছে।
আৰক্ষীয়ে বিচাৰি থকাৰৈ মাজতে ৰহমানে আজি মুখ্যমন্ত্রীৰ বিশেষ তদাৰকী কোষৰ ওচৰত আত্মসমৰ্পন কৰে। স্বাস্থ্য পৰীক্ষাৰ অন্তত তেওঁক আজি বিশেষ আদালতত হাজিৰ কৰোৱা হয়।
আৰক্ষীয়ে ৰহমানকে ধৰি আন ছয় অভিযুক্তক ৫ দিনৰ আৰক্ষীৰ জিম্মাত বিচৰা বুলি জানিব পৰা গৈছে। আতাউৰ ৰহমান গ্ৰেপ্তাৰৰ লগে লগে APDCLৰ নিযুক্তি কেলেংকাৰীত গ্ৰেপ্তাৰ কৰা মুঠ লোকৰ সংখ্যা ১১ জন হ’ল।
উল্লেখ্য ইয়াৰ পূৰ্বে অসম শক্তি বিতৰণ নিগম লিমিটেড (APDCL)ৰ নিযুক্তি পৰীক্ষা কেলেংকাৰীত জড়িত ১০জন লোকক আটক কৰিছিল মুখ্যমন্ত্রীৰ বিশেষ তদাৰকী কোষে।
মুখ্যমন্ত্ৰীৰ তদাৰকী কোষে (ভিজিলেন্স চেল) চলোৱা অভিযানত আটক হৈছিল ২০০৬ চনৰে পৰা APDCLৰ বিশেষ কৰ্তব্যৰত বিষয়া হিচাপে কার্যনির্বাহ কৰা দীপাংকৰ দিহিঙীয়া।
অভিযোগ অনুসৰি দিহিঙীয়াই ‘নেইকম ইম্প্রেছন্ছ’ নামৰ প্রতিষ্ঠানটোক নিযুক্তি পৰীক্ষাৰ দায়িত্ব দিয়াত মুখ্য ভূমিকা লৈছিল।
তদুপৰি,মুখ্যমন্ত্রীৰ বিশেষ তদাৰকী কোষে গুৱাহাটী বিশ্ববিদ্যালয়ৰ শশাংক শইকীয়া, ত্রিদিৱ শৰ্মা আৰু বিশ্ববিদ্যালয়খনৰ নিৰাপত্তাৰক্ষী বেবীলন কাকতিকো গ্ৰেপ্তাৰ ।
এই অভিযানত ‘নেইকম ইম্প্রেছনছ’ৰ কংকণ শৰ্মা, কৌশিক দাস, বিশ্বজিৎ বৰ্মন, দুলুমণি ডেকা, জয়ন্ত ডেকা আৰু ফাৰহা আলমকো গ্ৰেপ্তাৰ কৰা হৈছে।
মহানগৰীৰ বিভিন্ন স্থানৰ পৰা এই লোককেইজনক আটক কৰা হৈছে।
উল্লেখ্য যে ৰাজ্যপালৰ অভিযোগৰ ভিত্তিত মুখ্যমন্ত্রীৰ নিৰ্দেশত মুখ্যমন্ত্রীৰ বিশেষ তদাৰকী কোষে APDCLৰ নিযুক্তি কেলেংকাৰিৰ তদন্ত চলাই আছে।
২০১৯ চনত APDCLৰ ১,৬০০ কাৰ্যালয় সহায়ক পদৰ বাবে অনুষ্ঠিত লিখিত পৰীক্ষাত ব্যাপক বিসংগতিৰ অভিযোগ উত্থাপন হোৱাৰ বাবে পৰীক্ষাৰ ফলাফল ঘোষণা কৰিব পৰা নাছিল।
