SHERMAN ALI AHMED: কংগ্ৰেছী বিধায়ক শ্বেৰমান আলীয়ে কোন সময়ত বিতৰ্কিত তথা সাম্প্ৰদায়িক মন্তব্য কৰে সেয়া নিশ্চয়কৈ সকলোৰে দৃষ্টিগোচৰ হৈছে।বিজেপি দলৰ ইচাৰাত শ্বেৰমান আলিয়ে কৰে নেকি বিতৰ্কিত মন্তব্য? এসময়ত আজমলৰ দৰেই বিজেপিৰ এজেন্টলৈ ৰূপান্তৰিত হৈছে নেকি কংগ্ৰেছী বিধায়ক শ্বেৰমান আলী?
এসময়ত AIUDF দলত থাকোতে বদৰুদ্দিন আজমলৰ ঘনিষ্ঠ অনুচৰ হিচাপে পৰিচিত শ্বেৰমান আলীয়ে মিঞা মিউজিয়ামৰ প্ৰসংগৰ পাছতে এইবাৰ অসমৰ শ্বহীদৰ সম্পৰ্কত অতি অশোভনীয়-অপমানসূচক তথা বিৰূপ মন্তব্য কৰা পৰিলক্ষিত হৈছে।
নেলীৰ প্ৰসংগ উত্থাপনৰে শ্বহীদ দয়ানাথ শৰ্মাক কেন্দ্ৰ কৰি অপমানসূচক মন্তব্য দি শ্বেৰমানে কালি সংবাদ মাধ্যমৰ আগত কৈছিল ‘নেলীৰ দৰেই চাউলখোৱা চাপৰিত দয়ানাথ শৰ্মাৰ নেতৃত্বত মিঞা মানুহখিনিক হত্যাযজ্ঞ চলোৱো হৈছিল। হাতত বন্দুক লৈ দয়ানাথ শৰ্মাৰ নেতৃত্বত কেইবাহাজাৰো মিঞালোকক হত্যা কৰা হৈছিল। মিঞা মানুহখিনিয়ে আত্মৰক্ষাৰ কাৰণে তেওঁলোকক হত্যা কৰিছিল। হত্যাকাৰীক শ্বহীদ বুলি ক’লে ইতিহাস বিকৃত কৰা হ’ব।‘
তেওঁ লগতে শ্বহীদক অপমান কৰি কৈছিল, ‘হত্যাকাৰী-ঘাটক কেতিয়াও বন্দিত হ’ব নোৱাৰে তেওঁলোক নিন্দিত। আনকি যিসকলে নেলীত হত্যা কৰিবলৈ গৈছিল তেওঁলোকো ঘাতক। কিন্তু তেওঁলোকক শ্বহীদ বুলি ঘোষণা কৰি ৫ লাখকৈ টকা দিয়া হৈছে। তেওঁলোক শ্বহীদ নহয়।‘
উল্লেখযোগ্য যে, গৰুখুঁটিৰ উচ্ছেদৰ ঘটনাৰ পাছতো বহুদিন ধৰি নিশ্চুপ হৈ আছিল শ্বেৰমান আলী। কিন্তু হঠাৎ গৰুখুঁটি কাণ্ডক লৈ অসম আন্দোলনৰ শ্বহীদক অপমানসূচক মন্তব্যৰে যি বিদ্বেষৰ ভাৱ দাঙি ধৰিলে তাক লৈ এতিয়া অসম জ্বলিবলৈ আৰম্ভ কৰিছে।
আনকি ৰাজ্যৰ বিভিন্ন থানাৰ লগতে দিচপুৰ থানাত হিন্দুত্ববাদী নেতা সত্যৰঞ্জন বৰাই শ্বেৰমান আলীৰ গ্ৰেপ্তাৰৰ দাবী তুলি আজি তেওঁৰ বিৰুদ্ধে এজাহাৰ দাখিল কৰে।
আৰু পঢ়ক: OLA, UBER আউট, peindia ইন; কাইলৈৰ পৰা পথত নচলে OLA, UBER!
এতিয়া প্ৰশ্ন উঠিছে কাৰ উচটনিত বা কাৰ এজেন্টৰ ভূমিকা লৈ শ্বেৰমান আলীয়ে প্ৰত্যেকটো নিৰ্বাচনৰ পূৰ্বে এনেধৰণৰ মন্তব্যবোৰ কৰে?
ইয়াক লৈ প্ৰতিক্ৰিয়া প্ৰকাশ কৰি ৰাইজৰ দলৰ উপ-সভাপতি ৰাছেল হুছেইনে শ্বেৰমান আলীক ‘বিজেপিৰ এজেন্ট’ আখ্যা দিয়ে।
হুছেইনে কয়, ‘২০২১ ৰ বিধানসভা নিৰ্বাচনৰ প্ৰাকমুহূৰ্তত মিঞা মিউজিয়ামৰ প্ৰসংগ আনিছিল। ঠিক সেইদৰে উপ নিৰ্বাচনৰ পূৰ্বেও শ্বেৰমান আলীয়ে বিতৰ্কিত মন্তব্য কৰিছে। কাৰ শ্ৰুতলিপিত কোন সময়ত শ্বেৰমান আলীয়ে এনেবোৰ মন্তব্য কৰিছে আমি বিবেচনা কৰিব লাগিব।‘
‘মিঞা মিউজিয়ামৰ প্ৰসংগ উত্থাপন কৰাৰ পাছতো মিঞা লোকসকলৰ একো উত্তৰণ ঘটা নাই। বিজেপি ক্ষমতাত অহাৰ যিবোৰ কাৰক আছে তাৰ ভিতৰত অন্যতম শ্বেৰমান আলীৰ বক্তব্য। বিজেপিয়ে প্ৰত্যেকখন সভাত মিঞা মিউজিয়ামৰ প্ৰসংগ আনি মেৰু বিভাজনৰ ৰাজনীতি কৰিবলৈ সক্ষম হৈছিল। তাৰ ফলত শ্বেৰমান আলীৰ নিজৰো লাভ হৈছিল আৰু ৯৫ শতাংশ সংখ্যালঘু ভোটাৰ থকা সমষ্টিত তেওঁ এই বক্তব্যৰে জয় হৈ আহিছিল।‘ হুছেইনে এইদৰে কয়।
লগতে পঢ়ক: চীনে দখল কৰিছে নেপালৰ ভূমি; কাঠমাণ্ডুত উত্তাল প্ৰতিবাদ
তাৎপয্যপূৰ্ণভাৱে শ্বেৰমান আলীৰ বাবেই বিজেপি ক্ষমতালৈ আহিল বুলি দাবী কৰি হুছেইনে লগতে কয়, ‘শ্বেৰমান আলীয়ে বিজেপিৰ শ্ৰুতলিপিত এইবোৰ কাম কৰিছে। বিজেপিৰ লগত বুজা-পৰাৰ মাজেৰে পুনৰ সাম্প্ৰদায়িক বক্তব্যৰে সমাজখনৰ মেৰু বিভাজন কৰিবলৈ বিচাৰিছে’।
ইপিনে, শ্বেৰমান আলীৰ এই মন্তব্যৰ পাছতেই কংগ্ৰেছৰ বিৰুদ্ধে টিপ্পনি দিবলৈ সুযোগৰ সদব্যৱহাৰ কৰিছে মুখ্যমন্ত্ৰী ড০ হিমন্ত বিশ্ব শৰ্মাই।
তেওঁ কংগ্ৰেছৰ নেতৃত্বৰ বিৰুদ্ধেহে সৰৱ হৈ কয়, ‘সমস্যাটো শ্বেৰমান আলী নহয়, সমস্যাটো হ’ল শ্বেৰমান আলীৰ দৰে ব্যক্তিক ৰক্ষণাবেক্ষণ কোনে দিয়ে? আমাৰ অসমৰ মাটিতে ডাঙৰ-দীঘল হোৱা কংগ্ৰেছৰ অসমীয়া নেতাসকলে দিয়ে।‘
‘শ্বেৰমান আলী কেনেকুৱা ব্যক্তি সকলোৱে জানে। এনেকুৱা কথা কোৱা ব্যক্তিক আমি আমাৰ বৰঘৰত কেতিয়াও মাতিব নালাগে।‘ হিমন্তই এইদৰে কয়।
বাৰে বাৰে AIUDF প্ৰধান বদৰুদ্দিন আজমলক কংগ্ৰেছে বাৰেপতি বিজেপিৰ এজেন্ট সজাবলৈ চেষ্টা কৰিলেও তেওঁলোকৰ দলৰেই বিধায়ক শ্বেৰমান আলীয়ে একেই সুৰতেই বাট বুলিছে।
