ধুবুৰীত আৰক্ষীৰ জিম্মাৰ পৰা পলায়নৰ চেষ্টা কৰা এজন ড্ৰাগছ ব্যৱসায়ীক কৰায়ত্ব কৰিবলৈ আৰক্ষীয়ে যোৱা নিশা গুলীবৰ্ষণ কৰে।
ফলত ড্ৰাগছ ব্যৱসায়ী ৰাহুল প্ৰসাদ গুৰুতৰ ভাবে আহত হয়।
আহত ড্ৰাগছ ব্যৱসায়ীজনক ধুবুৰী অসামাৰিক চিকিৎসালয়ত ভৰ্তি কৰোৱা হৈছে।
ধুবুৰীৰ আৰক্ষী অধীক্ষক অভিজিৎ গৌৰৱে প্ৰকাশ কৰা মতে দেওবাৰে মাজনিশা ধুবুৰীৰ ধৰমশালাত আৰক্ষীৰ জিম্মাৰ পৰা ৰাহুল প্ৰসাদ নামৰ লোকজনে পলায়ন কৰিবলৈ চেষ্টা চলায়।
আৰক্ষীয়ে লোক জনক ৰ’ৱলৈ নিৰ্দেশ দিয়ে যদিও লোক জনে সেই নিৰ্দেশ অমান্য কৰাত বাধ্যত পৰি আৰক্ষীয়ে গুলীচলনা কৰে।
উল্লেখ্য ধুবুৰী আৰক্ষীয়ে অভিযান চলাই ৰাহুল প্ৰসাদৰ লগতে আন কেইজন মান ড্ৰাগছ সৰবৰাহকাৰীক গ্ৰেপ্তাৰ কৰিছিল।
ধুবৰী চহৰৰ বাসিন্দা ৰাহুল প্ৰসাদক ইয়াৰ পূৰ্বেও ড্ৰাগছ সৰবৰাহ কৰাৰ লগতে ফেচবুকত আপত্তিজনক পোষ্ট দিয়াৰ বাবে আৰক্ষীয়ে গ্ৰেপ্তাৰ কৰিছিল।
আৰক্ষীয়ে গ্ৰেপ্তাৰ কৰা লোক কেইজনৰ পৰা বৃহৎ মাত্ৰাত ড্ৰাগছ জব্দ কৰিবলৈ সক্ষম হৈছিল।
আৰক্ষীৰ গুলীত আহত ৰাহুল প্ৰসাদে প্ৰায়ে নিজকে বজৰং দলৰ সদস্য হিচাবে পৰিচয় দি আহিছিল।
