SBI in Action শেহতীয়াকৈ প্ৰৱঞ্চক চক্ৰৰ হাতোৰা অধিক সক্ৰিয় হৈ পৰাৰ লগতে বিভিন্ন কৌশলেৰে গ্ৰাহকৰ বেংক একাউন্টৰ পৰা ধন উলিয়াই নিয়াৰ ঘটনা বৃদ্ধি পাইছে।
আনকি গ্ৰাহকৰ হেৰাই যোৱা এটিএম কাৰ্ডৰ দ্বাৰাও ধন উলিয়াই নিয়াৰ ঘটনা ঘটিছে। সেয়ে, এই প্ৰৱঞ্চনা প্ৰতিৰোধ কৰাৰ বাবে ষ্টেট বেংক অফ ইণ্ডিয়াই পূৰ্বেই আনিছিল এটা পদ্ধতি।
এতিয়াৰে সেই পদ্ধতি আৰু কঠোৰভাৱে বলবৎ কৰাৰ সিদ্ধান্ত লৈছো বেংকটোৱে।
ষ্টেট বেংক অফ ইণ্ডিয়াই টুইট কৰি জনাইছে যে অধিক পৰিমানৰ টকা উলিয়াবলৈ OTP বাধ্যতামূলক কৰা হৈছে।
এতিয়াৰে পৰা এটিএমৰ পৰা টকা উলিয়াবলৈ গ’লে এছবিআইৰ গ্ৰাহকসকলে তেওঁলোকৰ একাউন্টৰ সৈতে পঞ্জীয়ন থকা ফোন নম্বৰৰ মোবাইল লগত লৈ যাব লাগিব।
গ্ৰাহকে ১০হাজাৰতকৈ অধিক টকা উলিয়াবলৈ গ’লে সেই ফোনত এটা OTP আহিব। সেইটো ব্যৱহাৰ কৰিহে গ্ৰাহকে টকা উলিয়াব পাৰিব।
অৱশ্যে কেবল কাৰ্ডৰ জৰিয়তে সৰ্বাধিক ৯,৯৯০টকা উলিয়াব পাৰিব। ইয়াৰ অধিক উলিয়াবলৈ হ’লে OTPৰ প্ৰয়োজন হ’ব।
আনহাতে, আন বেংকৰ এটিএমৰ পৰা এছবিআইৰ গ্ৰাহকে টকা উলিয়ালে এই পদ্ধতি কাৰ্যকৰী নহ’ব।
কিয়নো এই পদ্ধতি এতিয়াও নেশ্যনেল ফাইনেন্সিয়েল চুইছ (এনএফএছ) ব্যৱস্থাৰ সৈতে সংযুক্ত হোৱা নাই। এই এনএফএছ ব্যৱস্থাৰ জৰিয়তেই সকলো বেংকৰ গ্ৰাহকে আন যিকোনো বেংকৰ এটিএমৰ পৰা টকা উলিয়াব পাৰিব।
