Junior Hockey World Cup চলিত জুনিয়ৰ বিশ্বকাপ হকীৰ প্ৰথমখন মেচত পৰাজিত হোৱাৰ পাছত এইবাৰ উজ্জীৱিত প্ৰদৰ্শন দাঙি ধৰিলে ভাৰতীয় দলটোৱে। ফ্ৰান্সৰ বিৰুদ্ধে ৪-৫গ’লত পৰাস্ত হোৱাৰ পাছত কানাডাক ১৩-১গ’লৰ বৃহৎ ব্যৱধানত পৰাজিত কৰিলে ভাৰতে।
টীম ইণ্ডিয়াৰ সহ অধিনায়ক সঞ্জয় আৰু হুণ্ডাল সিঙে ভাৰতৰ হৈ হেট্ৰিক কৰে।
ভুৱনেশ্বৰৰ কলিংগ ষ্টেডিয়ামত গ্ৰুপ-বি’ৰ পুল মেচত ডিফেণ্ডিং চেম্পিয়ন ভাৰতৰ এই বৃহৎ বিজয়ে দলটোৰ ছেমিফাইনেললৈ যোৱাৰ আশা সজীৱ কৰি তুলিলে।
জুনিয়ৰ হকী বিশ্বকাপৰ ইতিহাসত এয়া হৈছে এখন মেচত দ্বিতীয় সৰ্বাধিক গ’লৰ ৰেকৰ্ড। উল্লেখ্য যে চলিত বিশ্বকাপতেই স্পেইনে আমেৰিকাক ১৭-০গ’লৰ ব্যৱধানত পৰাস্ত কৰি ৰেকৰ্ড গঢ়িছে।
ইপিনে, ভাৰতৰ সহ অধিনায়ক সঞ্জয়ে টুৰ্নামেন্টত তেওঁৰ ব্যক্তিগতভাৱে দ্বিতীয়টো হেট্ৰিক কৰে। ইয়াৰ পূৰ্বে ফ্ৰান্সৰ বিৰুদ্ধেও সঞ্জয়ে হেট্ৰিক কৰিছিল।
আনহাতে, আৰাইজিৎ সিং হুণ্ডালেও খেলখনত হেট্ৰিক কৰে। তদুপৰি, ভাৰতৰ হৈ উত্তম সিং আৰু সৰদানন্দ তিৱাৰীয়ে দুটাকৈ গ’ল কৰাৰ বিপৰীতে বিবেক সাগৰ প্ৰসাদ, অভিষেক লাক্ৰা আৰু মনিন্দৰ সিঙে এটাকৈ গ’ল কৰে।
ভাৰতে এই বিজয়েৰে গ্ৰুপত ফ্ৰান্সৰ পাছতে দ্বিতীয় স্থানলৈ উন্নীত হ’ল।
