বহুচৰ্চিত কৃষি আইন বাতিল বিধেয়ক আজি দুই সদনত গৃহীত হ’ল। কিন্তু কৃষি আইন বাতিলৰ পিছতো প্ৰতিবাদস্থলী ত্যাগ নকৰে প্ৰতিবাদী কৃষকে। এই কথা সদৰী কৰিছে কৃষক আন্দোলনৰ অন্যতম নেতা ৰাকেশ টিকাইটে।
ভাৰতীয় কিষাণ ইউনিয়নৰ নতাগৰাকীয়ে আজি কয় যে নূন্যতম সমৰ্থন মূল্য (MSP) আৰু অন্যান্য বিষয়ত আলোচনা নহ’লে কৃষকসকলে প্ৰতিবাদস্থলী এৰি নাযায়।
“চৰকাৰে বিচাৰে যে দেশত কোনো প্ৰতিবাদ হোৱা উচিত নহয় কিন্তু আমি আমাৰ অন্যান্য দাবীকে ধৰি MSP ৰ ওপৰত কোনো আলোচনাৰ আগতে প্ৰতিবাদস্থলী এৰি নাযাম।” সংবাদ মাধ্যমৰ আগত আজি এই মন্তব্য কৰে টিকাইটে।
লোকসভাত কৃষি আইন বাতিল বিধেয়ক, ২০২১ গৃহীত হোৱাৰ সন্দৰ্ভত সোধা প্ৰশ্নৰ উত্তৰত বিকেইউ- ৰ নেতাজনে কয়, “আন্দোলনৰ সময়ত প্ৰাণ হেৰুওৱা ৭৫০ জন কৃষকৰ প্ৰতি এয়া এক শ্ৰদ্ধাঞ্জলি। প্ৰতিবাদ অব্যাহত থাকিব কিয়নো এমএছপিকে ধৰি অন্যান্য বিষয়সমূহ এতিয়াও অমীমাংসিত হৈ আছে।”
উল্লেখ্য যে যোৱা ১৯ নৱেম্বৰত প্ৰধানমন্ত্ৰী মোদীয়ে কৃষি আইন বাতিল কৰা হ’ব বুলি ঘোষণা কৰিছিল। কৃষক নেতা টিকাইটে তেতিয়াই স্পষ্ট কৰি দিছিল যে সংসদত আইন বাতিল নোহোৱা পৰ্যন্ত আৰু MSP সন্দৰ্ভত আলোচনা নহ’লে প্ৰতিবাদ অব্যাহত থাকিব।
আজি সংসদৰ শীতকালীন অধিৱেশন আৰম্ভ হোৱাৰ পিছতে বিৰোধী সদস্যসকলে চৰকাৰ বিৰোধী শ্ল’গান দিয়াৰ পিছত লোকসভা দুপৰীয়া ১২ বজালৈ স্থগিত ৰখা হয়। নিম্ন সদন পুনৰ আৰম্ভ হোৱাৰ পিছত কেন্দ্ৰীয় কৃষি মন্ত্ৰী নৰেন্দ্ৰ সিং তোমৰে ”কৃষি আইন বাতিল বিধেয়ক, ২০২১ উত্থাপন কৰে। কোনো আলোচনা অবিহনেই আজি চৰকাৰে কৃষি আইন বাতিল বিধেয়ক সংসদত গৃহীত কৰে।
