গোৱালপাৰাত পাঁচটাকৈ বন্যহস্তী পুখুৰীৰ বোকাত আৱদ্ধ হৈ পৰাৰ ঘটনাই প্ৰকৃতিপ্ৰেমীসকল উদ্বিগ্ন কৰি তুলিছে।
জানিব পৰা মতে গোৱালপাৰা জিলাৰ লক্ষীপুৰৰ সমীপৱৰ্তী চৈবাৰী অঞ্চলত বন্য হস্তীৰ এটা দলে বিচৰণ কৰি থকাৰ সময়তে পাঁচটা হাতী বোকাৰে পৰিপূৰ্ণ পুখুৰীটোত পৰি যায় ।
বোকাত আৱদ্ধ হৈ পৰা হাতী কেইটাৰ ভিতৰত এটা পোৱালি হাতীও আছে। বন বিভাগৰ এগৰাকী কৰ্মীয়ে প্ৰকাশ কৰা মতে বন বিভাগৰ দলটোৱে হাতী কেইটা বোকাৰ মাজৰ পৰা উদ্ধাৰ কৰিবলৈ দুখনকৈ জেচিবি ব্যৱহাৰ কৰিছে।
স্থানীয় ৰাইজে প্ৰকাশ কৰা মতে হাতীৰ দলটোৱে খাদ্যৰ সন্ধানত মেঘালয়ৰ পাহাৰৰ পৰা সমতললৈ নামি আহিছিল। সেই সময়তে এই দুৰ্ঘটনাটো ঘটে। বাতৰি যুগুত কৰা পৰলৈকে বন বিভাগৰ লোকে বোকাত আৱদ্ধ হৈ পৰা হাতী কেইটা উদ্ধাৰ কৰিবলৈ সক্ষম হোৱাৰ পথত।
এই বিষয়ে স্থানীয় ৰাইজে বন বিভাগক অৱগত কৰাৰ পিছতে বনকৰ্মীৰ এটা দলে ঘটনাস্থলীত উপস্থিত হৈ বোকাত আৱদ্ধ হৈ পৰা হাতী কেইটাক উদ্ধাৰৰ চেষ্টা চলায়।
উল্লেখ্য মঙলবাৰে নিশাও কামৰূপ মেট্ৰ’ জিলাৰ ক্ষেত্ৰীত ৰাজধানী এক্সপ্ৰেছৰ খুন্দাত দুটা বনৰীয়া হাতীৰ মৃত্যু হৈছিল।
ক্ষেত্ৰী আৰক্ষী থানাৰ অন্তৰ্গত দুৰুং মইনাজান অঞ্চলত এই মৰ্মান্তিক দুৰ্ঘটনা সংঘটিত হয়।
খাদ্যৰ সন্ধানত বনৰীয়া হাতী কেইটাই ৰেলপথ পাৰ হ’বলৈ চেষ্টা কৰোঁতেই ৰে’লখনে হাতী দুটাক মহতিয়াই নিয়ে।
স্থানীয় লোকে জনোৱা মতে, মঙলবাৰে নিশা প্ৰায় ১০ বজাত এই ঘটনা সংঘটিত হয়।
স্থানীয় লোকে লগতে কয় যে, হাতীৰ এটা জাকে নিয়মীয়াকৈ খাদ্য বিচাৰি অঞ্চলটোত বিচৰণ কৰিছিল।
