২০১৮ চনত ভীমা কোৰেগাঁও গোচৰত গ্ৰেপ্তাৰ কৰা অধিবক্তা তথা সমাজকৰ্মী সুধা ভৰদ্বাজক আজি মুকলি কৰি দিয়া হয়। দুদিন পূৰ্বে বোম্বাই উচ্চ ন্যায়ালয়ে তেওঁক ১ ডিচেম্বৰত প্ৰদান কৰা ডিফল্ট জামিন স্থগিত ৰখাৰ বাবে ৰাষ্ট্ৰীয় অনুসন্ধান সংস্থাই দাখিল কৰা আবেদন নাকচ কৰিছিল উচ্চতম ন্যায়ালয়ে।
“আমি উচ্চ ন্যায়ালয়ৰ আদেশত হস্তক্ষেপ কৰাৰ কোনো কাৰণ দেখা নাই। আবেদন খাৰিজ কৰা হৈছে” ন্যায়াধীশ ইউ ইউ ললিত, এছ আৰ ভাট আৰু বেলা এম ত্ৰিবেদীৰ বিচাৰপীঠে সুধা ভৰদ্বাজৰ মুক্তিৰ ৰায় বাহাল ৰাখি কয়।
নিয়াৰ আদালতে কালি জামিনৰ চৰ্ত নিৰ্ধাৰণ কৰাৰ পিছত ভৰদ্বাজক বাইকুল্লা মহিলা কাৰাগাৰৰ পৰা মুকলি কৰি দিয়া হয়। উল্লেখ্য যে ভীমা কোৰেগাঁও গোচৰত গ্ৰেপ্তাৰ কৰা ১৬ জন কৰ্মীৰ ভিতৰত সুধা ভৰদ্বাজেই প্ৰথম ডিফল্ট জামিন লাভ কৰিছে।
ভৰদ্বাজক ২০১৮ চনৰ ২৮ আগষ্টত গ্ৰেপ্তাৰ কৰা হৈছিল আৰু পিছত তেওঁক গৃহবন্দী কৰি ৰখা হৈছিল। ইয়াৰ পিছত ২৭ অক্টোবৰ, ২০১৮ তাৰিখে তেওঁক জিম্মাত লোৱা হৈছিল।
৩১ ডিচেম্বৰ, ২০১৭ তাৰিখে এলগাৰ পৰিষদৰ সন্মিলনত দিয়া উচতনিমূলক ভাষণৰ অভিযোগত তেওঁৰ বিৰুদ্ধে গোচৰ দাখিল কৰা হৈছিল।
আৰক্ষীয়ে দাবী কৰিছিল যে এই অনুষ্ঠানৰ পিছদিনা চহৰখনৰ উপকণ্ঠত অৱস্থিত কোৰেগাঁও-ভীমা যুদ্ধ স্মাৰকৰ ওচৰত হিংসাত্মক ঘটনা সংঘটিত কৰাত এই ভাষণসমূহেই দায়ী আছিল। আৰক্ষীয়ে এইটোও অভিযোগ কৰিছিল যে সন্মিলনখন মাওবাদীৰ দ্বাৰা সমৰ্থিত আছিল।
ইতিমধ্যে উক্ত গোচৰত কাৰাবাসৰ সন্মুখীন হোৱা মানৱ অধিকাৰ কৰ্মী ষ্টেন স্বামীৰ কাৰাগাৰতে মৃত্যু হৈছে।
