প্ৰধামন্ত্ৰী নৰেন্দ্ৰ মোদীৰ মুখত সঘনে উচ্চাৰিত হৈ অহা এষাৰি বাক্যই হৈছে ‘বেটী বাচাও, বেটী পঢ়াও’।
ৰাজকোষৰ কোটি কোটি টকা খৰচ কৰি চৰকাৰে মহিলাসৱলীকৰণৰ বাবে গ্ৰহণ কৰা এই পদক্ষেপক সকলোৱে আদৰণি জনাইছিল যদিও অভিযানটোৱে যে বাস্তৱ অৰ্থৎ বিশেষ কোনো মহিলাৰেই সৱলীকৰণত সহায় কৰা নাই সেয়া এতিয়া স্পষ্ট হৈ পৰিছে।
কাৰণ ‘বেটী বাচাও, বেটী পঢ়াও’ অভিযানৰ বাবে আৱণ্টিত বিশাল ধনৰাশিৰ ৮০ শতাংশ ধনেই খৰচ কৰা হৈছে কেৱল বিজ্ঞাপনৰ নামত।
অৰ্থাৎ মোদীৰ চৰকাৰকে বিজ্ঞাপনৰ চমকেৰেই দেশৰ মহিলাসকলৰ উন্নয়ন সাধিব বিচাৰিছে। এয়া কোনো সাধাৰণ লোকে কোৱা কথা নহয়। এই বিষয়টো পোহৰলৈ আহিছে খোদ সংসদীয় সমিতিৰ প্ৰতিবেদনৰ জৰিয়তেই।
শেহতীয়াকৈ মহিলা সৱলীকৰণ সম্পৰ্কীয় সংসদীয় সমিতিয়ে লোকসভাত দাখিল কৰা প্ৰতিবেদনত কোৱা হৈছে যে যে ‘বেটী বাচাও, বেটী পঢ়াও’ অভিযানৰ নামত আৱণ্টিত ধনৰ ৭৮.৯১ শতাংশ ধন খৰচ কৰা হৈছে কেৱল বিজ্ঞাপন প্ৰকাশৰ নামত।
এনে চমক সৃষ্টিকাৰী বিজ্ঞাপন প্ৰকাশ তথা সম্প্ৰচাৰ কৰা হৈছে দেশৰ টেলিভিছন চেনেল, বাতৰিকাকত আদিত। ইয়াৰ লগতে বেনাৰ, পোষ্টাৰ, হ’ৰ্ডিং, লিফলেট আদিৰ নামতো পানীৰ দৰে খৰচ কৰা হৈছে ধন।
সংসদীয় সমিতিয়ে ‘বেটী বাচাও, বেটী পঢ়াও’ অভিযানৰ নামত অহা ধনৰ ৮০ শতাংশই বিজ্ঞাপনৰ নামত খৰচ কৰাৰ বিষয়টোত সেয়ে আশ্চৰ্য প্ৰকাশ কৰাৰ লগতে এই বিষয়ত চৰকাৰক সতৰ্ক কৰি দিয়াও পৰিলক্ষিত হৈছে
সংসদীয় সমিতি খনৰ অধ্যক্ষা হীনা বিজয় কুমাৰ গাভিটে প্ৰতিবেদন খনত চৰকাৰক সতৰ্ক কৰি দি কৈছে যে এতিয়ালৈকে যি হ’ল হ’ল, ভৱিষ্যতে যাতে ‘বেটী বাচাও, বেটী পঢ়াও’ অভিযানৰ ধন কেৱল বিজ্ঞাপনত খৰচ নকৰি মহিলাৰ শিক্ষা-স্বাস্থ্য আদিৰ উন্নয়নতহে অধিক পৰিমাণে খৰচ কৰা হয়।
প্ৰণিধানযোগ্য কথাটো হ’ল ভাৰতত লিংগ বৈষম্য দূৰ কৰিবলৈ ২০১৫ চনত প্ৰধানমন্ত্ৰী নৰেন্দ্ৰ মোদীয়ে আৰম্ভ কৰিছিল ‘বেটী বাচাও, বেটী পঢ়াও’ শীৰ্ষক অভিযান। কেন্দ্ৰীয় চৰকাৰে এই অভিযানৰ নামত বিশাল পৰিমাণৰ ধনো মঞ্জুৰ কৰিছিল। কিন্তু সেই ধনেৰে মহিলাৰ প্ৰকৃত উন্নয়ন সাধন কৰাৰ সলনি বিজ্ঞাপনৰ লেপনেৰে জনতাক প্ৰকৃত ছবি খন প্ৰত্যক্ষ কৰাৰ পৰা বিৰত কৰোৱা হ’ল।
উল্লেখ্য ২০১৬-১৯ বিত্তীয় বৰ্ষত এই অভিযানৰ বাবে কেন্দ্ৰই আৱণ্টন দিছিল ৪৪৬.৭২ কোটি টকা। কিন্তু ধনৰ ৭৮.৯১ শতাংশই প্ৰকৃত উন্নয়নৰ সলনি খৰচ কৰা হ’ল কেৱল বিজ্ঞাপনৰ নামত। এক কথাত কবলৈ গ’লে মদীৰ চৰকাৰে বিজ্ঞাপনৰ জৰিয়তেই মহিলাৰ সৱলীকৰণ সম্ভৱ কৰি তুলিলে!
তাৎপৰ্যপূৰ্ণ কথাটো হ’ল নিৰ্বাচিত একোখন জিলাত বছৰি ‘বেটী বাচাও, বেটী পঢ়াও’ অভিযানৰ বিজ্ঞাপনৰ বাবদ ৫০ লাখ টকাহে খৰচ কৰিব পাৰি। কিন্তু চমক সৃষ্টিৰ প্ৰৱণতা ইমানেই বাঢ়ি গ’লে যে সেই ৫০ লাখ টকাৰ সীমা চেৰাই কোটি কোটি টকা বিজ্ঞাপনৰ নামত খৰচ কৰা হ’ল।
মোদীৰ চৰকাৰ ২০১৪-২০১৫ ৰ পৰা ২০১৯-২০ বষলৈ ‘বেটী বাচাও, বেটী পঢ়াও’ অভিযানৰ বাবে চৰকাৰে আৱণ্টন দিছিল ৮৪৮ কোটি টকা। কিন্তু সেই ধনৰো সদ্ব্যৱহাৰ হৈ নুঠিল।
আৱণ্টিত ধনৰ মাত্ৰ ১৫৬.৪৬ কোটি টকা (২৫.১৩ শতাংশ) হে ৰাজ্য চৰকাৰ আৰু কেন্দ্ৰ শাসিত অঞ্চল সমূহে ব্যৱহাৰ কৰিব পাৰিছে। এই কথাৰ পৰাই প্ৰমাণ হয় যে ‘বেটী বাচাও, বেটী পঢ়াও’ অভিযানক চৰকাৰে কিমান সহৃদয়তাৰে গ্ৰহণ কৰিছে।
