চিৰাং জিলাৰ ডাংতলৰ নিকটৱৰ্তী ডিমাকুমাৰী ৰাভাপাৰাত বিটিচিৰ বন বিভাগৰ কাৰ্যবাহী সদস্য ৰঞ্জিত বসুমতাৰীয়ে এক বনভোজস্থলী মুকলি কৰে ৷
ইয়াৰ পূৰ্বে চিদলী বিধান সভা সমষ্টিৰ বিধয়ক জয়ন্ত বসুমতাৰীয়ে বনভোজস্থলীত ভূমেশ্বৰ পাহাৰক ভক্তি জনাই বন্তি প্ৰজ্বলন কৰে ৷
বনভোজস্থলী মুকলিৰ কাৰ্যসূচী অনুসৰি বিটিচিৰ পৰিষদীয় সদস্য মাধৱ চন্দ্ৰ ছেত্ৰী আৰু কাজলগাওঁ পৌৰসভাৰ সভাপতি ৰণগৌৰা নাৰ্জাৰীয়ে পাহাৰৰ নামনিত ফল-মূলৰ গছ পুলি ৰোপণ কাৰ্যসূচী মুকলি কৰে ৷
কাৰ্যসূচীত বিধায়ক জয়ন্ত বসুমতাৰী, বিটিচিৰ কাৰ্যবাহী সদস্য ৰঞ্জিত বসুমতাৰী আৰু উদ্যেতা সকলৰ লগতে ইউ পি পি দলৰ নেতা কৰ্মী সকলে অংশ লয় ৷ ভূমেশ্বৰ পাহাৰৰ নামনিত কুঁজিয়া নৈৰ প্ৰাকৃতিক সৌন্দৰ্য তথা নৈসৰ্গিক পৰিৱেশত অৱস্থিত বনভোজস্থলী মুকলি উপলক্ষে এক উদ্বোধনী অনুষ্ঠান অনুষ্ঠিত হয় ৷
চিদলীৰ বিধায়ক জয়ন্ত বসুমতাৰীয়ে বনভোজস্থলীত পৰিয়ালৰ সকলোৱে আহিব পৰা পৰিৱেশ সৃষ্টিৰে পৰিৱেশ দিলে বনভোজস্থলীৰ মৰ্যাদা পাব বুলি উল্লেখ কৰাৰ লগতে ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাই জিলা সমূহৰ আৱৰ্ত ভৱন সমূহ প্ৰাকৃতিক পৰিৱেশত হোৱাটো আশা কৰাত চিৰাঙৰ আৱৰ্ত ভৱনটো ভূমেশ্বৰ পাহাৰৰ নামনিৰ পৰিৱেশত হোৱাৰ পোষকতা কৰে|
অনুষ্ঠানত বিটিচিৰ কাৰ্যবাহী সদস্য ৰঞ্জিত বসুমতাৰীয়ে বিটিচিত বিগত বিপিএফৰ শাসনৰ কালছোৱাত বিটিচিৰ পৰ্যটনৰ ঠাই সমূহ উন্নয়নমুখী কৰাৰ বিপৰীতে মদ, জুৱাৰ আড্ডা কৰাৰ ফলত যুৱ সমাজ বিপথে পৰিচালিত হোৱা বুলি উল্লেখ কৰে ৷
তেওঁ সম্প্ৰতি বিটিচিৰ মুৰব্বী প্ৰমোদ বড়ো নেতৃত্বাধীন প্ৰশাসনে বিটিচিৰ পৰ্যটনস্থলী সমূহত নিবনুৱা যুৱক- যুৱতী সকলক আত্ম নিৰ্ভৰশীল হোৱাৰ লক্ষ্যৰে অৰ্থনৈতিক উন্নয়নত গুৰুত্বাৰোপ কৰাৰ কথা কথা ব্যক্ত কৰে ৷
