স্বাধীন অসমৰ দাবীত সংগ্ৰাম আৰম্ভ কৰা আলফাৰ প্ৰায় ২০,০০০ নেতা সদস্য শ্বহীদ হ’ল। ইয়াৰে কিছু সংখ্যকৰ কথা আমি জানো যদিও প্ৰায় সংখ্যকৰে জীৱন কাহিনী অসমৰ ৰাইজৰ জ্ঞাত নহয়।
কি পৰিস্থিতিত তেওঁলোকে প্ৰাণ দিছিল বা কি কাৰণত তেওঁলোকে সশস্ত্ৰ সংগ্ৰামখনত ভৰি দিছিল, এনে বহু কথা ইতিহাসৰ পৰা বুটলি আনি জ্যেষ্ঠ সাংবাদিক ধীৰুমণি গগৈয়ে লিখি উলিয়াইছে ‘নিষিদ্ধ যোদ্ধা: দ্য হিডেন চেপ্টাৰ্ছ’ নামৰ গ্ৰন্থখন।
অল ক্লিয়াৰ অপাৰেচনৰ সময়ত আলফাৰ ভূটানৰ শিবিৰত কি হৈছিল সেয়া শিবিৰত থকা এজন আলফা সদস্যই ডায়েৰীত লিখি থৈ গৈছিল।
উক্ত ডায়েৰীখনৰ সবিশেষ গ্ৰন্থখনত সন্নিৱিষ্ট কৰাৰ লগতে আলফাৰ ইতিহাসৰ ভয়াৱহ থানা আক্ৰমণৰ ঘটনা, আলফাৰ পতনৰ আৰম্ভণিৰ কাহিনী, শ্বিলঙত আটক কৰা ৰুবুল দাসক যোৰাবাটত হত্যা কৰাৰ সবিশেষ, কিদৰে আলফা নেতা অবিনাশ, নৰেনে নিজৰ চিতা নিজেই সাজিছিল আদি বহু নজনা কথা গ্ৰন্থখনত উল্লেখ কৰা হৈছে।
আনহাতে ডিএইচডিৰ নেতা জুৱেল গাৰ্লোচাক গ্ৰেপ্তাৰ কৰাৰ লগতে অসমত মাওবাদীৰ ভেঁটি স্থাপন কৰিবলৈ চেষ্টা চলোৱা টিংৰাজ ওৰাঙ সম্পৰ্কেও অৱগত কৰিছে লেখকে।
উল্লেখ্য যে বিগত বৰ্ষত প্ৰকাশিত ‘নিষিদ্ধ যোদ্ধা: দ্য আনট’ল্ড ষ্ট’ৰীজ’ৰ জৰিয়তে পাঠক সকলৰ মাজত পৰিচিত হৈ পৰা সাংবাদিক গগৈৰ নতুন গ্ৰন্থখন আজি গুৱাহাটীৰ শ্বহীদ ন্যাসত উন্মোচন কৰে লেখিকা ৰীতা চৌধুৰীয়ে। গ্ৰন্থখন প্ৰকাশ কৰিছে মিডিয়া হাইপ নামৰ প্ৰকাশন গোষ্ঠীটোৱে।
