ৰাজনীতিত দ্বিতীয় ইনিংছ আৰম্ভ কৰিব নেকি হৰভজন সিঙে? কংগ্ৰেছত যোগ দিব নে বিজেপিত যোগ দিব টীম ইণ্ডিয়াৰ তাৰকা ক্ৰিকেটাৰজনে? পাঞ্জাৱ কংগ্ৰেছৰ নতুন মুখ হৈ পৰিব নেকি হৰভজন সিং?
শুকুৰবাৰে ক্ৰিকেট তাৰকাগৰাকীয়ে সকলো ধৰণৰ ক্ৰিকেটৰ পৰা অৱসৰগ্ৰহণ কৰিছে। তাৰপাছতে তাৰকাৰগৰাকীয়ে ৰাজনীতিত যোগ দিয়াক লৈ চৰ্চা চলিছে।
অৱশ্যে সদ্যহতে তাৰকাগৰাকীয়ে এইসমূহৰ উত্তৰ দিব বিচৰা নাই। সাংবাদিকৰ আগত তেওঁ কয় যে তেওঁৰ ভৱিষ্যতৰ পৰিকল্পনাক লৈ এতিয়ালৈকে একো ভবা নাই।
ইতিমধ্যে কেইবাটাও ৰাজনৈতিক দলৰ পৰা তেওঁ প্ৰস্তাৱ লাভ কৰিছে বুলি মন্তব্য কৰে হৰভজনে। যদি ৰাজনীতিত জড়িত হয়, তেন্তে সকলোকে এই বিষয়ে সময়ত জনোৱা হ’ব বুলিও তেওঁ কয়।
তাৰকাগৰাকীক লৈ এই চৰ্চা আৰম্ভ হয় কিছু দিন পূৰ্বে পঞ্জাৱৰ কংগ্ৰেছ নেতা তথা প্ৰাক্তন ক্ৰিকেটাৰ নৱজোত সিং সিদ্ধুৱে সামাজিক মাধ্যমত প’ষ্ট কৰা এখন ফটোক লৈ।
সিদ্ধুৱে হৰভজনক লগ কৰাৰ এখন ফটো প’ষ্ট কৰে। ফটোখনৰ স’তে ইংৰাজীত তেওঁ কৌশলপূৰ্ণভাৱে এষাৰি বাক্য লিখে। তেওঁ লিখে যে ফটোখনে বহুতো সম্ভাৱনা প্ৰকট কৰিছে।
হৰভজনক তেওঁ shining star তথা উদ্ভাসিত তাৰকা হিচাপেও আখ্যা দিয়ে। কিন্তু খেলপথাৰত এগৰাকী কিংম্বদন্তি হিচাপে ইতিমধ্যে হৰভজন জনাজাত হৈ পৰিছে। কিন্তু তেনেস্থলত কিয় তাৰকাগৰাকীক উদ্ভাসিত তাৰকা বুলি সিদ্ধুৱে আখ্যা দিছে, সেই লৈও চৰ্চা আৰম্ভ কৰিছে। ৰাজনৈতিক জগততো উদ্ভাসিত তাৰকা হৈ পৰিবলৈ উলাইছে নেকি হৰভজন?
অৱশ্যে পাছত ফটোখনক লৈ হৰভজনে কয় যে যিহেতু পঞ্জাৱৰ নিৰ্বাচন চমু চাপি আহিছে, সেয়ে সিদ্ধুৰ স’তে তোলা ফটোখনক লৈ চৰ্চা আৰম্ভ হৈছে। প্ৰকৃততে সিদ্ধুৰ স’তে সাক্ষাৎটো ৰাজনৈতিক নাছিল বুলিও তেওঁ স্পষ্ট কৰি দিয়ে।
উল্লেখযোগ্য যে হৰভজনে ৰাজনীতিত প্ৰৱেশ কৰাৰ বিষয়টো ২০১৯ চনৰ লোক সভা নিৰ্বাচনৰ সময়তো উত্থাপন হৈছিল। তেতিয়াও তেওঁ বিষয়টো অগ্ৰাহ্য কৰিছিল।
আনহাতে, অহা ফেব্ৰুৱাৰী-মাৰ্চত পঞ্জাৱত বিধানসভা নিৰ্বাচন অনুষ্ঠিত হ’ব। ইতিমধ্যে কংগ্ৰেছ- বিজেপি- আকালী দল আৰু আম আদমী পাৰ্টিয়ে ৰাজ্যখনক লৈ ব্যস্ত হৈ পৰিছে। কৃষি আইন বিৰোধী আন্দোলনৰ পৰাও ৰাজনৈতিক দল গঠন হৈছে।
তেনেস্থলত হৰভজন সিঙৰ দৰে চেলিব্ৰেটিয়ে কংগ্ৰেছত যোগদান কৰাৰ চৰ্চাটো লক্ষ্যণীয় হৈ পৰিছে।
