ছয় জনগোষ্ঠীৰ জনজাতিকৰণ সম্পৰ্কত মুখ্যমন্ত্ৰী ড° হিমন্ত বিশ্ব শৰ্মাই যি মন্তব্য আগবঢ়াইছে সেয়া অত্যন্ত আপত্তিকৰ আৰু গৰিহণাযোগ্য। ছয় জনগোষ্ঠীৰ দীৰ্ঘদিনীয়া আৰু ন্যায়সংগত দাবী এটাক নস্যাৎ কৰিবলৈ গৈ মুখ্যমন্ত্ৰী ড° শৰ্মাই এনেদৰে মিথ্যাচাৰৰ আশ্ৰয় লৈছে।
ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে মুখ্যমন্ত্ৰীৰ এই মিথ্যাচাৰ আৰু আপত্তিজনক মন্তব্যৰ পৰা আঁতৰি জনজাতিকৰণৰ বাবে দ্ৰুত কাৰ্যকৰী ব্যৱস্থা ল’বলৈ দাবী জনাইছে।
ৰাজ্যৰ টাই আহোম, মৰাণ, মটক, কোচ ৰাজবংশী, চাহ জনগোষ্ঠী আৰু চুতীয়া জনগোষ্ঠীৰ জনজাতিকৰণৰ দাবী জনাই ৰাজনৈতিক দল সংগঠনসমূহে দীৰ্ঘ আন্দোলন সংগ্ৰাম চলাই আহিছে।
Also Read: ৰাজ্যৰ ছয় জনগোষ্ঠীৰ জনজাতিকৰণৰ প্ৰসংগত মুখ্যমন্ত্ৰীয়ে কৰা মন্তব্যৰ প্ৰতিবাদ আক্ৰাছুৰ
এই দাবীক সমৰ্থন জনাই বিধান সভাত সৰ্বসন্মত প্ৰস্তাৱ গ্ৰহণ কৰি কেন্দ্ৰীয় চৰকাৰলৈ প্ৰেৰণ কৰিছে। বিজেপি দলেও এখোজ আগুৱাই গৈ চৰকাৰ গঠন হ’লে ছয় মাহৰ ভিতৰত ছয় জনগোষ্ঠীৰ জনজাতিকৰণ কৰিম বুলি ৰাজহুৱা প্ৰতিশ্ৰুতি দিছিল।
কিন্তু ইমানৰ পাছতো বিজেপি চৰকাৰে বিষয়টো সম্পৰ্কত দীৰ্ঘদিনে আভুৱাভাৰি ছয় জনগোষ্ঠীক বঞ্চনা আৰু প্ৰতাৰণা কৰাৰ লগতে গণতান্ত্ৰিক আন্দোলন এটাক ৰাজহুৱা অপমান কৰিছে।
অসমৰ প্ৰতিটো জনগোষ্ঠীয়ে দীৰ্ঘদিনে সমিলমিলে বসবাস কৰি আহিছে। এনে অৱস্থাত ছয় জনগোষ্ঠীৰ জনজাতিকৰণ সন্দৰ্ভত প্ৰস্তুত কৰা প্ৰতিবেদন দাখিল কৰিলেই অসমত ৰক্তাক্ত পৰিস্থিতি সৃষ্টি হ’ব বুলি মুখ্যমন্ত্ৰীয়ে যি মন্তব্য দিছে সেয়া বিশ্বাসযোগ্য নহয়।
Also Read:“কৃষি আইন সম্পৰ্কে আলোচনাৰ বাবে মিলিত হওঁতে অহংকাৰ প্ৰদৰ্শন কৰিছিল মোদীয়ে”- দাবী সত্যপাল মালিকৰ
বৰং মুখ্যমন্ত্ৰীৰ অতি স্পৰ্শকাতৰ এই বক্তব্যহে সংঘাতপূৰ্ণ পৰিস্থিতিৰ সৃষ্টি কৰিব। সেয়ে ডি ৱাই এফ আইয়ে দাবী কৰিছে মুখ্যমন্ত্ৰীয়ে স্পৰ্শকাতৰ বিষয়ত সংযতভাৱে মন্তব্য কৰক আৰু ছয় জনগোষ্ঠীৰ নায্য দাবী শীঘ্ৰে পূৰণ কৰক।
