‘বুল্লি বাই’ এপ ঘটনাৰ মূল অভিযুক্ত অসমৰ যোৰহাটৰ নীৰজ বিষ্ণইয়ে দিল্লী আৰক্ষীক আত্মহত্যা কৰাৰ ভাবুকি দিছে।
‘’তেওঁ দুবাৰকৈ নিজক ক্ষতি কৰাৰ চেষ্টা চলাইছিল আৰু আত্মহত্যা কৰাৰ ভাবুকি দিছিল। তেওঁৰ যথোপযুক্ত চোৱাচিতা কৰা হৈছে,’’-দিল্লী আৰক্ষীৰ তদন্তকাৰী দলটোৱে জানিবলৈ দিয়ে।
নীৰজ বিষ্ণইয়ে অভিযোগ অনুসৰি এই বহুচৰ্চিত ‘বুল্লি বাই’ এপটো সৃষ্টি কৰিছিল যিটো মুছলমান মহিলাক নিলাম কৰাৰ বাবে একাংশ ধৰ্মান্ধকাৰীয়ে ব্যৱহাৰ কৰিছিল।
‘’অভিযুক্ত বিষ্ণইয়ে মুছলমান মহিলাক নিলাম কৰা ‘চুল্লী ডীল’ নামৰ এপটোৰ সৃষ্টি কৰা লোকজনক জানে বুলি স্বীকাৰ কৰিছিল। তেওঁ মুম্বাই আৰক্ষীয়ে গ্ৰেপ্তাৰ কৰা স্বেতা সিঙৰ ইউজাৰ একাউন্টতো ব্যৱহাৰ কৰিছিল বুলিও মানি লৈছে,’’-দিল্লী আৰক্ষীৰ তদন্তকাৰী দলৰ ডিচিপি কে পি এছ মালহোত্ৰাই জানিবলৈ দিয়ে।
‘বুল্লি বাই’ এপটো দৰাচলতে ‘চুল্লী ডীল’ৰ এটা ক্ল’নহে আছিল।
উল্লেখ্য যে গিটহাব নামৰ এটা ৱেবছাইট ব্যৱহাৰ কৰি আপত্তিজনক মন্তব্যৰ লগতে মুছলমান মহিলাসকলৰ আলোকচিত্ৰ প্ৰকাশ কৰি নিলাম কৰিছিল এই বুল্লি বাই কাণ্ডৰ অভিযুক্ত সকলে।
দিল্লীৰ এগৰাকী সাংবাদিকে ৱেবছাইটত তেওঁৰ ফটোৰ অপব্যৱহাৰ হোৱাৰ বিষয়ে দিল্লী আৰক্ষীৰ ওচৰত অভিযোগ দাখিল কৰাৰ পিছত এই কুকাণ্ড পোহৰলৈ আহে।
আমেৰিকা যুক্তৰাষ্ট্ৰৰ ছফ্টৱেৰ বিকাশ প্লেটফৰ্ম গিটহাবত সংযুক্ত ৱেবছাইটটোত কমেও ১০০ গৰাকী মুছলমান মহিলাক লক্ষ্য কৰি লোৱা হৈছিল।
আৰক্ষীয়ে জনোৱা অনুসৰি তেওঁলোকে অনুসন্ধানৰ অংশ হিচাপে বিষ্ণইৰ আইপি ঠিকনা অনুসৰণ কৰিছে।
“আমি দেখিছোঁ যে ইতিমধ্যে গ্ৰেপ্তাৰ হোৱা আন তিনিজন ব্যক্তিয়ে বিষ্ণইৰ নিৰ্দেশনা অনুসৰণ কৰি আছিল। বিষ্ণইয়ে তেওঁলোকক টুইটাৰত একাউণ্ট সৃষ্টি কৰিবলৈ নিৰ্দেশনা প্ৰদান কৰিছিল।” আৰক্ষীৰ এক সূত্ৰই কৈছিল।
