অৰ্ণবৰ পিছত এইবাৰ মুৰাছু। এটাৰ পিছত এটাকৈ দুয়োটা ঘূৰ্ণীবতাহৰ গতিয়েই অন্ধ্ৰ প্ৰদেশ অভিমুখে। অতি তীব্ৰ ৰূপৰে অন্ধ্ৰ উপকূলত বিধ্বংসী ৰূপ ধাৰণ কৰিছিল ঘূৰ্ণীবতাহ অৰ্ণবে। ঘূৰ্ণীবতাহ মুৰাছুৱেও ব্যাপক ক্ষতি কৰাৰ সম্ভাৱনা আছে।
বৰ্তমান মুৰাছুৱে বংগোপসাগৰৰ ওপৰত শক্তি বৃদ্ধি কৰি আছে। সোমবাৰে নিশাই ভয়াৱহ ঘূৰ্ণীবতাহ হিচাপে আঘাত হানিব পাৰে মুৰাছুৱে।
বতৰ বিজ্ঞান বিভাগে জনোৱা মতে, ঘূৰ্ণীবতাহ মুৰাছুৱে ঘণ্টাত ২৫ কিলোমিটাৰ বেগেৰে পশ্চিম-মধ্য আৰু কাষৰীয়া দক্ষিণ-পশ্চিম বংগোপসাগৰৰ ওপৰেৰে গতি কৰি আছে। ইয়াৰ দিশ পশ্চিম-উত্তৰ-পশ্চিম।
নিশাটোৰ ভিতৰতে ভয়াৱহ ঘূৰ্ণীবতাহলৈ পৰিণত হৈছে। উপকূলৰ পৰাও দূৰত্ব কমিছে। সোমবাৰে পুৱা ৫:৩০ বজালৈকে এই ঘূৰ্ণীবতাহ চেন্নাইৰ পৰা ২০০ কিলোমিটাৰ পূব-উত্তৰ-পূব, অন্ধ্ৰ প্ৰদেশৰ নেল্লোৰৰ পৰা ২১০ কিলোমিটাৰ পূব-দক্ষিণ-পূব, মাচিলিপট্টনমৰ পৰা ২৭০ কিলোমিটাৰ দক্ষিণ-দক্ষিণ-পূব, কাৱালীৰ পৰা ২২০ কিলোমিটাৰ পূব-দক্ষিণ-পূব, অংগোলৰ পৰা ৪০০ কিলোমিটাৰ দক্ষিণ-পূব আৰু বিশাখাপট্টনমৰ পৰা ২৬০ কিলোমিটাৰ দক্ষিণ-পূবত অৱস্থান কৰিছে।
মুৰাছুৱে আৰু অধিক তীব্ৰতৰ হৈ উত্তৰ-পশ্চিম দিশলৈ গৈ অন্ধ্ৰপ্ৰদেশৰ উপকূল পাবগৈ। সোমবাৰে মাজনিশা অন্ধ্ৰ উপকূলৰ নেল্লোৰ আৰু নৰছাপুৰৰ মাজত স্থলপথত প্ৰৱেশ কৰিব।
‘লেণ্ডফ’ল’ৰ সময়ত ধুমুহাৰ গতিবেগ প্ৰতি ঘণ্টাত ১০০ৰ পৰা ১১০ কিলোমিটাৰ হ’ব। বতাহৰ গতিবেগ প্ৰতি ঘণ্টাত ১২০ কিলোমিটাৰ পৰ্যন্ত হ’ব পাৰে। মঙলবাৰে পুৱাৰ ভিতৰত স্থলভাগত আঘাত কৰাৰ প্ৰক্ৰিয়া সম্পূৰ্ণ হ’ব পাৰে।
