আজি শিল্পী দিৱসৰ দিনা অসম চৰকাৰে অসমৰ সাংস্কৃতিক জগতখনলৈ আগবঢ়োৱা অৱদানৰ বাবে বহুকেইগৰাকী ব্যক্তিক বিভিন্ন বঁটাৰে সন্মানিত কৰাৰ লগতে বহুকেইগৰাকী শিল্পীলৈ আগবঢ়োৱা শিল্পী পেঞ্চন,এককালীন সাহাৰ্য প্ৰদান কৰিব।
কিন্তু এই শিল্পী পেঞ্চনৰ তালিকাৰ পৰা এই বাৰো বঞ্চিত হৈ ৰ’ল মঘাই ওজাৰ প্ৰিয় শিষ্য সত্তৰ উৰ্ধৰ টীয়কৰ বলাই হাজৰিকা ওজা।
দীৰ্ঘদিন ধৰি শিল্পী পেঞ্চনৰ বাবে আবেদন কৰিও বঞ্চিত হোৱা বলাই হাজৰিকাই এইবাৰ আশা কৰিছিল শিল্পী পেঞ্চন লাভ কৰিব বুলি।
কিন্তু এইবাৰো বঞ্চিত হোৱাত দুখত ভাগি পৰিছে ঢুলীয়া শিল্পী গৰাকী।উল্লেখযোগ্য যে বিগত সময়ত অসমৰ বহুকেইগৰাকী জনপ্ৰিয় শিল্পী বলাই ওজাৰ খবৰ ল’বলৈ বিভিন্ন সময়ত টীয়কস্থিত তেওঁৰ বাসগৃহত উপস্থিত হৈছিল।
এইসকলে প্ৰতিবাৰে অন্ততঃ শিল্পী পেঞ্চনৰ বাবে বলাই ওজাৰ নাম সন্নিৱিষ্ট কৰাৰ আশ্বাস দিছিল যদিও আজিও পেঞ্চন নোপোৱাত দুখ প্ৰকাশ কৰে বয়োবৃদ্ধ শিল্পীগৰাকীয়ে।
ঢোলবাদনৰ জৰিয়তে শ্ৰোতা ৰাইজক আপ্লুত কৰি অহাৰ লগতে বিহু সংস্কৃতিক জীয়াই ৰাখিবলৈ অহোপুৰুষাৰ্থ কৰা বলাই ওজাৰ সাম্প্ৰতিক আৰ্থিক অৱস্থা অতিশয় দুখজনক।
আমাৰ স্থানীয় সংবাদদাতাৰ সন্মুখত নিজৰ আৰ্থিক অৱস্থাৰ কথা সুঁৱৰি শোকত ভাগি পৰে বলাই ওজা।
জীৱনৰ এই শেষ বেলিকাত তেওঁক পেঞ্চনৰ ব্যৱস্থা কৰি জীৱন যাপনৰ সুবিধা কৰি দিবৰ বাবে চৰকাৰলৈ কাতৰ আহ্বান জনাইছে।
