এয়াৰ ইণ্ডিয়াক চলিত সপ্তাহৰ শেষৰ ফালে টাটা গোটক হস্তান্তৰ কৰাৰ সম্ভাৱনা আছে। এগৰাকী জ্যেষ্ঠ চৰকাৰী বিষয়াই আজি এই কথা সদৰি কৰিছে।
এক প্ৰতিযোগিতামূলক নিবিদা প্ৰক্ৰিয়াৰ পিছত কেন্দ্ৰীয় চৰকাৰে যোৱা বৰ্ষৰ ৮ অক্টোবৰত এয়াৰ ইণ্ডিয়াক টাটা গোটৰ হোল্ডিং কোম্পানীৰ সহায়ক কোম্পানী টেলেচ প্ৰাইভেট লিমিটেডক ১৮,০০০ কোটি টকাত বিক্ৰী কৰিছিল।
ইয়াৰ পিছত ১১ অক্টোবৰত টাটা গোটলৈ এক অভিপ্ৰায় পত্ৰ (এলঅ’আই) জাৰী কৰি এয়াৰলাইনৰ ১০০ শতাংশ অংশ বিক্ৰী কৰিবলৈ চৰকাৰৰ ইচ্ছা নিশ্চিত কৰা হৈছিল।
২৫ অক্টোবৰত কেন্দ্ৰই এই চুক্তিৰ বাবে শ্বেয়াৰ ক্ৰয় চুক্তি (এছপিএ) স্বাক্ষৰ কৰে।
জেষ্ঠ বিষয়াজনে আজি কয় যে এই চুক্তি সন্দৰ্ভত বাকী থকা আনুষ্ঠানিকতাসমূহ অহা কেইদিনমানৰ ভিতৰত সম্পূৰ্ণ হ’ব বুলি আশা কৰা হৈছে আৰু এই সপ্তাহৰ শেষৰ ফালে বিমান সংস্থাটো টাটা গোটক হস্তান্তৰ কৰা হ’ব।
চুক্তিৰ অংশ হিচাপে টাটা গোটক এয়াৰ ইণ্ডিয়া এক্সপ্ৰেছ আৰু গ্ৰাউণ্ড হেণ্ডলিং আৰ্ম এয়াৰ ইণ্ডিয়া এছএটিএছৰ ৫০ শতাংশ অংশীদাৰীত্ব হস্তান্তৰ কৰা হ’ব।
