আফগানিস্তানৰ পৰিস্থিতিকলৈ আজি প্ৰধানমন্ত্ৰী নৰেন্দ্ৰ মোদীয়ে গভীৰ উদ্বেগ ব্যক্ত কৰে। তালিবানৰ নাম উচ্চাৰণ নকৰা কৈয়ে মোদীয়ে কয় যে আফগানিস্তানৰ পৰিস্থিতিৰ পৰা মধ্য এছিয়াই শিক্ষা ল’ব লাগিব।
আজি প্ৰধানমন্ত্ৰী নৰেন্দ্ৰ মোদীয়ে ভাৰত-মধ্য এছিয়া সন্মিলনত ভিডিঅ’ কনফাৰেন্সৰ জৰিয়তে ভাষণ দিয়ে। সন্মিলনত অংশগ্ৰহণ কৰি মোদীয়ে কয় যে আভ্যন্তৰীণ সুৰক্ষা আৰু সমৃদ্ধিৰ স্বাৰ্থত ভাৰত আৰু মধ্য এছিয়াৰ মাজত সু-সমন্বয় স্থাপন কৰাটো অতি জৰুৰী হৈ পৰিছে।
তেওঁ কয়— ‘আজিৰ সন্মিলনৰ তিনিটা লক্ষ্য আছে। প্ৰথমতে, আঞ্চলিক সুৰক্ষা আৰু সমৃদ্ধিৰ বাবে ভাৰত আৰু মধ্য এছিয়াৰ মাজত পাৰস্পৰিক সহযোগিতা বৃদ্ধি কৰা। দ্বিতীয় লক্ষ্য হৈছে আমাৰ সহযোগিতাক এক শক্তিশালী ৰূপ প্ৰদান কৰা। তৃতীয় লক্ষ্য হৈছে আমাৰ সহযোগিতাৰ বাবে এক সু-পৰিকল্পিত ৰোডমেপ প্ৰস্তুত কৰা।’
মোদীয়ে তেওঁৰ ভাষণত কয় যে এতিয়া সকলোৱে আফগানিস্থানৰ পৰিস্থিতিক লৈ চিন্তিত । এনে পৰিস্থিয়ে সেয়ে ভাৰত আৰু মধ্য এছিয়াৰ মাজত সহযোগিতা বৃদ্ধিৰ বিষয়টোক অধিক জৰুৰী কৰি তুলিছে। আজিৰ ভাৰ্চুৱেল সন্মিলনত পাঁচগৰাকী ৰাষ্ট্ৰপতিয়ে অংশগ্ৰহণ কৰে।
কাজাখস্তানৰ ৰাষ্ট্ৰপতি কাচিম-জোমাৰ্ট টোকায়েভ, উজবেকিস্তানৰ শৱকত মিৰ্জিয়োয়েভ, তাজিকিস্তানৰ এমোমালি ৰহমান, তুৰ্কমেনিস্তানৰ গুৰবানগুলি বেৰ্দিমুহামেদো আৰু কিৰগিজ গণৰাজ্যৰ ছাদিৰ জাপাৰোভে সন্মিলনত অংশগ্ৰহণ কৰে।
