অন্তিম মূহূৰ্তত লালদানমাওইয়া ৰাল্টে পেনাল্টীৰ সহায়ত প্ৰদান কৰা গ’লৰ সহায়ত ইষ্ট বেংগল ফুটবল দলে ছুপাৰ কাপ প্ৰতিযোগিতাৰ ছেমিফাইনেলত প্ৰৱেশ কৰে। দেওবাৰে উৰিষ্যাৰ ভূৱনেশ্বৰস্থিত কালিংগা ষ্টেডিয়ামত ৰোমাঞ্চকৰে ভৰা প্ৰথমখন কোৱাৰ্টাৰ ফাইনেল খেলত ইষ্ট বেংগলে ১-০ গ’লৰ ব্যৱধানত পৰাস্ত কৰিবলৈ সক্ষম হয় আইজল এফ চিক।
উল্লেখ্য যে দ্বিতীয়াৰ্ধৰ নিৰ্ধাৰিত সময়লৈকে গ’ল কৰিবলৈ ব্যৰ্থ হোৱা দুয়োটা দলৰে খেলুৱৈ তথা প্ৰশিক্ষকসকলে মেচখন অতিৰিক্ত সময়লৈকে যাব বুলি ধাৰণা কৰিছিল। কিন্তু মেচৰ ইঞ্জুৰি টাইমৰ অন্তিম মিণিটত আইজল এফ চিৰ গ’লৰক্ষকগৰাকীয়ে প্ৰতিপক্ষৰ খেলুৱৈক আক্ৰমণ কৰাত ৰেফাৰীয়ে আইজলৰ বিপক্ষে পেণাল্টী ঘোষণা কৰে। আৰু তেতিয়াই ৰল্টেই দলৰ হৈ বিজয়সূচক গ’লটো প্ৰদান কৰে।
উল্লেখ্য যে প্ৰথমাৰ্ধৰ পৰাই ইষ্ট বেংগলে আইজল এফ চিৰ বিপক্ষে আক্ৰমণাত্মক মনোভাবেৰে খেলপথাৰত নামিছিল যদিও কিন্তু আইজল এফ চিয়ে তেওঁলোকৰ সকলো প্ৰচেষ্টা সম্পূৰ্ণৰূপে ব্যৰ্থ কৰে।
আনহাতে আইজলেও মেচখনত কিছু পৰিমানে দৰ্শনীয় খেলৰ প্ৰদৰ্শন কৰিছিল যদিও গ’ল কৰাত তেওঁলোকো ব্যৰ্থ হোৱা পৰিলক্ষিত হয়।
আক্ৰমণ-প্ৰত্যাক্ৰমণৰে ভৰা মেচখনত সকলোৰে দৃষ্টি আকৰ্ষণ কৰিবলৈ সক্ষম হয় আইজল এফ চিৰ গ’লকীপাৰ লালমপুইয়া। গোটেই মেচখনতে বিপক্ষৰ বিৰুদ্ধে গ’লকীপাৰগৰাকীয়ে বহুতো প্ৰত্যাক্ৰমণ ৰোধ কৰিবলৈ সক্ষম হয়।
কিন্তু যুৱ খেলুৱৈ লালমপুইয়াই মেচৰ ইঞ্জুৰী টাইমত কৰা এটা ভূলৰ বাবে আইজল এফ চিয়ে ছুপাৰ কাপৰ প্ৰথম সংস্কৰণৰ ছেমি ফাইনেল খেলাৰ পৰা বঞ্চিত হ’বলগীয়া হ’ল।
আনহাতে ছুপাৰ কাপ প্ৰৰতিযোগিতাৰ দ্বিতীয়খন কোৱাৰ্টাৰ ফাইনেল অহা ১১ এপ্ৰিলৰ দিনা শ্বিলং লাজং আৰু মোহন বাগানৰ মাজত অনুষ্ঠিত হ’ব।
