দেৱালয়, মঠ-মন্দিৰকে আদি কৰি চাহ বাগিছাৰ বাবে পৰ্যটনৰ মান চিত্ৰত প্ৰসিদ্ধ এই বিশ্বনাথ। জিলাখনৰ সদৰ হিচাপেও সকলোৰে জনাজাত বিশ্বনাথ চাৰিআলি। বিভিন্ন বিভাগৰ বিষয়া, মুৰব্বী, পৰিপূৰ্ণ শিক্ষানুষ্ঠানকে আদি কৰি ভৰি আছে বিশ্বনাথ চাৰিআলি।
আটক ধুনীয়া কৰি তুলিবলৈ আৰু সৌন্দৰ্য বৰ্ধনৰ বাবে চৰকাৰে সময়ে সময়ে বিভিন্ন পদক্ষেপ লৈ আহিছে যদিও অৱহেলিত হৈ আহিছে এটা বিশেষ স্থান। য’ত ধ্বংসৰ গৰাহত পৰিণত হ’বলৈ ধৰিছে উত্তৰ-পূবৰ প্ৰথমটো ক্লক টাৱাৰ।
২০১৪ চনৰ জুন মাহত সেই সময়ৰ বিশ্বনাথ মহকুমাৰ মহকুমাধিপতি তথা বিশ্বনাথ উৎসৱ উদযাপন সমিতিৰ সভাপতি নাৰায়ণ কোঁৱৰে বিশ্বনাথ উৎসৱ-২০১২ আৰু ২০১৩ বৰ্ষৰ ৰাহি হোৱা ধন আৰু পাৱাৰগ্ৰীড প্রকল্পৰ আর্থিক সহযোগিতাৰে নিৰ্মিত হোৱা উত্তৰ পূৰ্বাঞ্চলৰ প্ৰথমটো ক্লক টাৱাৰ উদ্বোধন কৰিছিল।
লগতে পঢ়ক: পিছুৱাই দিয়া হ’ল এইবাৰৰ NEET-PG পৰীক্ষা; মানি ল’লে বহু MBBS ইন্টাৰ্ণৰ দাবী!
প্ৰথম পৰ্যায়ত সকলো ঠিকেই আছিল। সময় বাগৰাৰ লগে লগে ক্ৰমান্বয়ে বন্ধ হৈ পৰিল ঘড়ীটো। আটকধুনীয়া আৰু জিলাখনৰ এক সুকীয়া পৰিচয় দিবলৈ সক্ষম হোৱা বিশ্বনাথ চাৰিআলিৰ ত্ৰিমূৰ্তি উদ্যানস্থিত ক্লক টাৱাৰ আজি ধ্বংসৰ গৰাহত। বহু বছৰ ধৰি বিকল হৈ পৰি ৰ’ল উত্তৰ পূৰ্বাঞ্চলৰ আটকধুনীয়া এই ক্লক টাৱাৰটো ।
প্ৰশ্ন হয়, কাৰ হেমাহিৰ বাবে আজি এই অৱস্থা? কিয় মেৰামতিৰ বাবে সময় নাই দায়িত্বত থকা বিভাগীয় কৰ্তৃপক্ষৰ? নে নিৰ্মাণ কৰিয়েই দায়িত্ব সামৰিলে সংশ্লিষ্ট কৰ্তৃপক্ষই?
এই প্ৰশ্নসমূহ বিশ্বনাথৰ ৰাইজৰ। জিলাখনৰ আকৰ্ষণৰ কেন্দ্ৰবিন্দু হিচাপে পৰিগণিত হৈ অহা ক্লক টাৱাৰ মেৰামতিৰ ক্ষেত্ৰত বিশ্বনাথ জিলা প্ৰশাসনে কেনেধৰণৰ ব্যৱস্থা গ্ৰহণ কৰে সেইয়া পৰৱৰ্তী সময়ত অৱশ্যে লক্ষ্যণীয় হ’ব।
