বোধহয় ইয়াকে কয় স্বভাৱগত প্ৰতিভা। অসমৰ দৰে আন্তঃগাঁথনিৰ বিশেষ সুবিধা নথকা তথা খেলুৱৈৰ বাবে কোনো বিশেষ চৰকাৰী সমৰ্থন নথকা ৰাজ্য এখনৰ এখন ভিতৰুৱা গাৱঁৰ, এটা তেনেই সাধাৰণ খেতিয়ক পৰিয়ালৰ এজনী ছোৱালীয়ে দৌৰত চেৰ পেলালে উন্নত উন্নত দেশৰ, উভৈনদী সা-সুবিধাৰ মাজেৰে নিজকে সাজু কৰি অনা প্ৰতিদ্বন্দ্বীক।
সঁচাকৈয়ে ভাবিলে আচৰিত হ’ব লাগে যে দুবছৰ আগলৈকে কমনৱেল্থ গেইমছৰ বিষয়ে বিশেষ জ্ঞান নথকা নগাঁৱৰ ধিং অঞ্চলৰ এটা সাধাৰণ খেতিয়ক পৰিয়ালৰ ছোৱালী হিমা দাস আজি দেশৰ সংবাদ মাধ্যমৰ শিৰোনাম দখল কৰিলে কমনৱেল্থ গেইমছত কৰা প্ৰদৰ্শনৰ বাবে।
আজি অষ্ট্ৰেলিয়াত চলি থকা কমনৱেল্থ গেইমছৰ মহিলাৰ ৪০০ মিটাৰ দৌৰৰ ফাইনেলত প্ৰৱেশ কৰাৰ লগে লগে সংবাদ মাধ্যমে হিমা দাসৰ খবৰ বেচ উৎসাহেৰে প্ৰচাৰ কৰিছে। আনহাতে অসমৰ ছ’চিয়েল মিডিয়াৰ ব্যৱহাৰকাৰীয়ে হিয়া উজাৰি প্ৰশংসা কৰাৰ লগতে কাইলৈ হ’ব লগীয়া ফাইনেলৰ বাবে ছ’চিয়েল মিডিয়াত শুভেচ্ছাৰ জোৱাৰ দেখা গৈছে।
উল্লেখযোগ্য যে আজি অনুষ্ঠিত মহিলাৰ ৪০০ মিটাৰ দৌৰ প্ৰতিযোগিতাৰ প্ৰথমখন ছেমি ফাইনেলত ব্যক্তিগত শ্ৰেষ্ঠ প্ৰদৰ্শনেৰে হিমাই তৃতীয় স্থান দখল কৰে। তেওঁ সময় লৈছিল ৫১.৫৩ ছেকেণ্ড।
কাইলৈ খেলুৱৈগৰাকীয়ে পদকৰ বাবে চূড়ান্ত দৌৰত অংশ ল’ব। ফাইনেলত দৌৰিব লগীয়া প্ৰতিযোগীসকলৰ মাজত সময় মানৰ ক্ষেত্ৰত হিমা সপ্তম স্থানত আছে। হ’লেও ক্ৰমে নিজৰ সময় মান উন্নীত কৰি নিয়া হিমাৰ ক্ষেত্ৰত ৰাজ্য তথা দেশে যথেষ্ট আশাৰ ৰেঙনি দেখিছে। কাৰণ ২০১৬ চনৰ পৰাই, যেতিয়াৰ পৰা হিমাই পেচাদাৰীভাৱে দৌৰিবলৈ আৰম্ভ কৰিছিল, তেতিয়াৰ পৰাই নিজৰ সময়মান ক্ৰমে উন্নত কৰি নিয়া দেখা গৈছে। ছেমি ফাইনেলতো আমি তাৰেই প্ৰতিফলন দেখিলো।
মন কৰিব লগীয়া কথাটো হ’ল আজি নিজৰ প্ৰতিভাৰ বলত আজি সংবাদ মাধ্যম তথা ছ’চিয়েল মিডিয়াৰ শিৰোমণি হৈ পৰা হিমাই কেতিয়াও কল্পনাই কৰা নাছিল এনে এটা পৰ্য্যায়ৰ সফলতাৰ কথা। পূৰ্বে দিয়া এটা সাক্ষাৎকাৰত হিমাই কৈছিল যে আনকি তেওঁ দুবছৰ আগলৈকে কমনৱেল্থ গেইমছৰ কথা শুনাই নাছিল।
খেতিয়ক মাক-দেউতাকৰ পাঁচজন সন্তানৰ ভিতৰত হিমা আছিল একেবাৰে সৰু। আৰ্থিক সচ্ছলতা নথকা পৰিয়ালটোৰ সামৰ্থ্য নাছিল তেওঁক খেলুৱৈ কৰি গঢ়াৰ। তাৰ মাজতে হিমাই নিজে পঢ়া বিদ্যালয়খনত ফুটবল খেলিছিল মাজে মাজে। তাৰ পিছতে হিমাক প্ৰথমৰ পৰাই গাইড দিয়া নৱজিৎ মালাকাৰ আৰু নিপন দাসৰ পৰামৰ্শত দৌৰক নিজৰ কেৰিয়াৰ হিচাপে বাছি লয়। তাৰ পিছতো বহুতো অপ্ৰত্যাশিত ডেওনা, অপ্ৰত্যাশিত সফলতাৰ মাজেৰে হিমাই আগ বাঢ়ি মাত্ৰ দুবছৰৰ ভিতৰতে বিশ্ব পৰ্য্যায়ৰ প্ৰতিযোগিতাত সকলোৰে দৃষ্টি কঢ়া এগৰাকী এথলীটত পৰিণত হৈছে। এনেকুৱা উন্নতি কেৱল স্বাভাৱিক প্ৰতিভাৰ বলতহে সম্ভৱ আৰু ইয়াক একে আষাৰে চমৎকাৰ বুলি কোৱাটো কোনো অতিৰঞ্জন নহয়।
