হাজো- গুৱাহাটী পথত আজি পুনৰ এটা ভয়াবহ পথ দুৰ্ঘটনা ঘটে। হাজোৰ দিশৰ পৰা গুৱাহাটী অভিমুখী এখন মটৰ চাইকেলক একে দিশৰ পৰা গৈ থকা এখন দ্ৰুতবেগী বাছে কেইবামিটাৰলৈ চোঁচৰাই নিয়ে।
অভয়পুৰত হোৱা এই পথ দুৰ্ঘটনাটোক কেন্দ্ৰ কৰি পুৱাই উত্তেজনাময় পৰিস্থিতিৰ সৃষ্টি হয়। দুৰ্ঘটনাটো ইমানেই ভয়াবহ আছিল যে মটৰ চাইকেলখন ভাঙি চুৰমাৰ হৈ পৰে।
ইপিনে, দুৰ্ঘটনাটো ঘটাৰ সময়ত দ্ৰুতবেগী বাছখনৰ পৰা চলি থকা অৱস্থাতেই চালকজনে পলায়ন কৰে।ইয়াৰ ফলত বাছৰ একাংশ যাত্ৰীও কিছু পৰিমাণে আঘাতপ্ৰাপ্ত হয়।
এই দুৰ্ঘটনাটোত গুৰুতৰভাবে আঘাতপ্ৰাপ্ত মটৰ চাইকেল আৰোহী গৰাকীক সংকটজনক অৱস্থাত প্ৰথমে হাজো বিষ্ণুৰাম মেধি সামূহিক স্বাস্থ্যকেন্দ্ৰত ভৰ্তি কৰোৱা হয় যদিও পিছলৈ উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পাতাললৈ প্ৰেৰণ কৰা হয়।
বৰ্তমানলৈকে লোকজনৰ পৰিচয় জানিব পৰা হোৱা নাই। দুৰ্ঘটনাগ্ৰস্ত মটৰ চাইকেলখনৰ নম্বৰ হৈছে UP-20-A-0798।