ইউৰোপৰ সৰ্ববৃহৎ পাৰমাণৱিক শক্তি প্ৰকল্পত আক্ৰমণ চলালে ৰাছিয়াই। ৰাছিয়াৰ আক্ৰমণৰ পিছত জ্বলি উঠিছে ইউৰোপৰ সৰ্ববৃহৎ পাৰমাণৱিক শক্তি প্ৰকল্প।
ইউক্ৰেইনৰ বৈদেশিক মন্ত্ৰী ডিমিট্ৰো কুলেবাই ৰাছিয়াৰ আক্ৰমণৰ এই শেহতীয়া খবৰ ৰাজহুৱা কৰিছে।
তেওঁ লগতে এই আক্ৰমণৰ ফলত ভয়াৱহ পৰিস্থিতিৰ সৃষ্টি হোৱাৰ আশংকাত এই স্থানত তাৎক্ষণিক যুদ্ধবিৰতিৰ দাবী জনায়।
ৰাছিয়াৰ সৈন্যৰ আক্ৰমণৰ সময়ত পাৰমাণৱিক শক্তি প্ৰকল্পটোৰ এটা উৎপাদন অংশ ক্ষতিগ্ৰস্ত হৈছে আৰু প্ৰকল্পটোৰ কিছু অংশ জুইত জ্বলি উঠিছে বুলি ইউক্ৰেইনৰ পাৰমাণৱিক শক্তি মন্ত্ৰালয়ে জানিবলৈ দিছে।
অৱশ্যে প্ৰকল্পটোৰ এজন মুখপাত্ৰই সংবাদ সংস্থা RIA ৰ আগত উল্লেখ কৰা অনুসৰি বিকিৰণৰ পৃষ্ঠভূমিৰ স্তৰৰ কোনো সলনি হোৱা নাই।
ৰাছিয়াৰ সেনাই ইউৰোপৰ সৰ্ববৃহৎ পাৰমাণৱিক শক্তি প্ৰকল্প জাপোৰিজজিয়া এনপিপিৰ ওপৰত সকলো ফালৰ পৰা গুলীবৰ্ষণ কৰি আছে বুলি বৈদেশিক মন্ত্ৰী ডিমিট্ৰো কুলেবাই টুইট কৰে।
“ইতিমধ্যে প্ৰকল্পটোত জুই লাগিছে। ৰাছিয়ানসকলে তৎকালীনভাৱে আক্ৰমণ বন্ধ কৰিব লাগিব। অগ্নিনিৰ্বাপক বাহিনীক অনুমতি দিব লাগিব, এটা সুৰক্ষা ক্ষেত্ৰ স্থাপন কৰিব লাগিব!”- টুইটটোত তেওঁ লগতে কয়।
উল্লেখ্য যে ৰাছিয়া-ইউক্ৰেইন যুদ্ধ আজি নৱম দিনত উপনীত হৈছে। সমগ্ৰ ইউক্ৰেইনতে ৰাছিয়াৰ আক্ৰমণে দিশহাৰা কৰি তোলাৰ সময়তে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে পশ্চিমক সামৰিক সাহায্য বৃদ্ধি কৰিবলৈ আহ্বান জনাইছে।
