যুদ্ধভূমিৰ ধোঁৱা আৰু বাৰুদৰ মাজতো প্ৰেমৰ বিজয় ঘোষণা কৰি বিবাহপাশত আৱদ্ধ হ’ল ইউক্ৰেইনৰ সেনা বাহিনীৰ এক প্ৰেমিক যুগল। ইতিমধ্যে এই বিবাহৰ ছবি সামাজিক মাধ্যমত ভাইৰেল হৈ পৰাৰ লগতে ব্যাপক চৰ্চাৰ বিষয় হৈ পৰিছে।
ইউক্ৰেইনৰ ৰাজধানী কীয়েভত ৰাছিয়াৰ সেনাৰ সামৰিক আগ্ৰাসনৰ মাজতেই সামৰিক সাজত বিবাহপাশত আৱদ্ধ হয় ইউক্ৰেইনৰ সেনাৰ প্ৰেমিক যুগল লেছিয়া আৰু ভালেৰিয়ে।
লেছিয়া আৰু ভালেৰিৰ এই বিবাহত উপস্থিত থাকি কীয়েভৰ মেয়ৰে কয় যে তেওঁলোক বহুদিন ধৰি একেলগে আছে, এইবাৰ বিয়াৰ সিদ্ধান্ত লৈছে।
এনেদৰে বিবাহপাশত আৱদ্ধ হ’বলৈ পাই লেছিয়া আৰু ভালেৰি দম্পতি অত্যন্ত সুখী। কইনা লেছিয়াই কয়, ‘’এই যুদ্ধৰ মাজত যে জীয়াই আছো, তাতেই আমি খুব আনন্দিত। নতুন দিন আৰম্ভ হৈছে। মোৰ স্বামীও মোৰ লগত আছে।‘’
ৰাছিয়াৰ সামৰিক অভিযানত ইউক্ৰেইনৰ বিস্তৰ ক্ষতিসাধন হৈছে। কিন্তু ইউক্ৰেইনৰ সেনা বাহিনীয়েও ৰাছিয়াৰ আক্ৰমণক প্ৰতিৰোধ কৰাৰ বাবে যৎপৰোনাস্তি চেষ্টা চলাইছে। দেশখনৰ ৰাজধানী কীয়েভ এতিয়া দুয়োপক্ষৰ বাবে যুদ্ধৰ কেন্দ্ৰবিন্দু হৈ পৰিছে।
