বৃহস্পতিবাৰে ঘোষণা কৰা হ’ব।উত্তৰ প্ৰদেশ বিধানসভা নিৰ্বাচনৰ ফলাফল। ভোট গণনাৰ দুদিন পূৰ্বে মঙ্গলবাৰে সমাজবাদী পাৰ্টিৰ মুৰব্বী অখিলেশ যাদৱে শাসনাধিষ্ঠিত বিজেপিৰ ওপৰত ভোট চুৰি কৰাৰ অভিযোগ উত্থাপন কৰিছে।
মঙ্গলবাৰে এখন সংবাদমেল আহ্বান কৰি অখিলেশ যাদৱে কিছুমান ভিডিঅ’ ইভিএম চুৰিৰ প্ৰমাণ হিচাপে প্ৰদৰ্শন কৰে।
বাৰাণসীৰ এটা গণনা কেন্দ্ৰত ইভিএম অসুৰক্ষিত অৱস্থাত ৰখা হৈছে আৰু ইভিএম সমূহ তিনিখন ট্ৰাকত লৈ যোৱা হৈছে বুলি অখিলেশ যাদৱে অভিযোগ কৰে। ইয়াৰে এখন ট্ৰাক সমাজবাদী পাৰ্টিৰ কৰ্মীয়ে বাধা দিছিল তেওঁ দাবী কৰে।
অখিলেশ যাদৱৰ এই অভিযোগৰ পিছতে সংবাদ মাধ্যমৰ সৈতে বাৰ্তালাপ কৰি বাৰাণসীৰ ডিএম কৌশল শৰ্মাই কয়, “ভোটগ্ৰহণৰ ইভিএম পৰিবহন কৰা হৈছে বুলি ৰাইজৰ মাজত বিভ্ৰান্তিৰ সৃষ্টি হৈছে । কিন্তু এয়া ভোটদানৰ ইভিএম নহয়। এই ইভিএম সমূহ প্ৰশিক্ষণৰ বাবেহে অনা হৈছিল।”
তদুপৰি ৰাজ্যৰ মুখ্য নিৰ্বাচনী বিষয়াইও এক বিবৃতিত কয় যে বুধবাৰে নিৰ্ধাৰিত ভোটগ্ৰহণ বিষয়াসকলৰ প্ৰশিক্ষণৰ বাবে বাৰাণসীত ইভিএম অনা হৈছিল। তেওঁ লগতে কয় যে ভোটদানত ব্যৱহৃত ইভিএমবোৰ চীল কৰা হৈছে আৰু ২৪ ঘণ্টাই নিৰীক্ষণৰ জৰিয়তে সুৰক্ষিত অৱস্থাত ৰখা হৈছে।
আনহাতে তেওঁলোকৰ বিবৃতি খণ্ডন কৰি অখিলেশ যাদৱে “যদি প্ৰশিক্ষণৰ বাবে ইভিএম পৰিবহন কৰা হৈছিল, প্ৰাৰ্থীসকলক কিয় অৱগত কৰা হোৱা নাছিল” বুলি প্ৰশ্ন কৰে।
তেওঁ লগতে বাৰাণসীৰ ডিএম কৌশল শৰ্মাৰ বিৰুদ্ধেও পক্ষপাতীত্বৰ অভিযোগ উত্থাপন কৰে। “মই এই ডিএমক মুজাফ্ফৰনগৰত নিযুক্তি দিয়াৰ পৰাই চিনি পাওঁ। তেওঁ এই কাৰ্যত সন্মতি দিছে। বিজেপিয়ে যি বিচাৰে, তেওঁ সেয়াই ক’ব” বুলি যাদৱে অভিযোগ কৰে।
তেওঁ লগতে বাৰানসীৰ ডিএম কৌশল শৰ্মা আৰু ৰাজ্যৰ নিৰ্বাচনী আয়ুক্তৰ বিৰুদ্ধে ব্যৱস্থা গ্ৰহণৰ দাবী জনায়।
