যোৱা নিশা ৰাভা হাছং স্বায়ত্ত্বশাসিত পৰিষদ এলেকাৰ দায়ৰং চেলাপাৰাত ৰাভা জাতীয় পৰিষদৰ সাধাৰণ সম্পাদকৰ বাসগৃহত দুৰ্বৃত্তই আক্ৰমণ চলাই বাসগৃহ লণ্ড-ভণ্ড কৰাৰ লগতে বাহন এখনো ভাঙি চূৰ্ণ-বিচূৰ্ণ কৰে ৷
ৰাভা জাতীয় যুৱ পৰিষদৰ সাধাৰণ সম্পাদক প্ৰফুল্ল ৰংখৰ বাসগৃহত নিশা প্ৰায় ১:৪৫ বজাত দুৰ্বৃত্তৰ দল এটাই অতৰ্কিতে আক্ৰমণ চলায় ৷
নিশাৰ এই আক্ৰমণত প্ৰফুল্ল ৰংখৰ বাসগৃহৰ বিস্তৰ ক্ষতি সাধন হোবাৰ লগতে তেঁৱৰ A S 18 G 5776 নম্বৰৰ চাৰিচকীয়া বাহনৰো যথেষ্ট ক্ষতি সাধন হয়।
অৱশ্যে নিশা ঘৰৰ ভিতৰত শুই থকাৰ বাবে কোনো নিশ্চিত আক্ৰমণৰ পৰা ৰক্ষা পৰে প্ৰফুল্ল ৰংখ।
এই ঘটনাটোৱে সমগ্ৰ ৰাভা হাছং অঞ্চলত চাঞ্চল্যৰ সৃষ্টি কৰিছে ৷ ইফালে এই ঘটনাত ৰাভা হাছং স্বায়ত্ব শাসিত পৰিষদৰ মুখ্য কাৰ্যবাহী সদস্য টংকেশ্বৰ ৰাভা জড়িত থকাৰ এক গুৰুতৰ অভিযোগ উত্থাপন কৰিছে ৰাভা জাতীয় যুৱ পৰিষদৰ সাধাৰণ সম্পাদক প্ৰফুল্ল ৰংখ তথা ৰাভা জাতীয় পৰিষদৰ নেতৃত্বই ৷
উল্লেখ্য যে, যোৱা ছেপ্টেম্বৰ মাহতো এই গৰাকী প্ৰফুল্ল ৰংখৰ ওপৰত আক্ৰমণৰ ঘটনা সংঘটিত হৈছিল ৷
প্ৰফুল্ল ৰংখৰ অভিযোগ যে, পূৰ্বে তেওঁক আক্ৰমণ কৰা দুৰ্বৃত্তই পুনৰ যোৱা নিশাৰ আক্ৰমণতো তেওঁলোক জড়িত আছে ৷
ইতিমধ্যে ৰাভা জাতীয যুৱ পৰিষদে জিলা প্ৰশাসনৰ উচ্চতম মহলৰ সৈতে সাক্ষাৎ কৰাৰ অন্তত কৃষ্ণাই আৰক্ষী থানাত এখন এজাহাৰ দাখিল কৰা বুলি পৰিষদৰ সূত্ৰই জনাইছে ৷
