আইপিএল-২০২২ৰ আৰম্ভণিতে শনিবাৰে উদ্বোধনী মেচখনত কলকাতা নাইট ৰাইডাৰ্ছে চেন্নাইছুপাৰ কিংছক পৰাজিত কৰে। শ্ৰেয়াস আয়াৰৰ নেতৃত্বত কলকাতাই ৯টা বল বাকী থকা অৱস্থাতে ৬ উইকেটত হৰুৱায় ৰবীন্দ্ৰ জাডেজাৰ নেতৃত্বৰ চেন্নাইক।
প্ৰথমে বেটিং কৰিবলৈ নমা চেন্নাই ছুপাৰ কিংছৰ ১০ অভাৰত ৬১ৰাণত ৫টাকৈ উইকেটৰ পতন ঘটে। সংকট মোচকৰ ৰূপত মহেন্দ্ৰ সিং ধোনীয়ে মাত্ৰ ৩৮টা বলত কৰা ৫০ৰাণৰ সহায়ত চেন্নাইয়ে সন্মানজনক ১৩১ৰাণ সংগ্ৰহ কৰিবলৈ সক্ষম হয়। আইপিএলৰ এই ছিজনৰ প্ৰথমটো অৰ্দ্ধ শতৰাণ কৰে ধোনীয়ে।
ইপিনে, আৰম্ভণিতে চেন্নাইৰ বেটিংক্ৰমত আঘাত হানে উমেশ যাদবে। প্ৰথমতে যাদবে দুটা উইকেট দখল কৰি চেন্নাইক বেকফুটলৈ ঠেলি দিয়ে। কলকাতাৰ হৈ বৰুণ চক্ৰৱৰ্তী আৰু আন্দ্ৰে ৰাছেলে এটাকৈ উইকেট লয়।
চাপৰ মাজত খেলি ধোনী আৰু জাডেজাই ১৭ নম্বৰ অভাৰৰ পৰা আক্ৰমণাত্মক হৈ পৰে। চেন্নাইয়ে অন্তিম ৩ অভাৰত ৪৭ৰাণ কৰে। ধোনীয়ে ৭টা চাৰি আৰু এটা বিশাল ছয়েৰে ৩৮টা বলত ৫০ৰাণ কৰাৰ বিপৰীতে জাডেজাই ২৮টা বলত ২৬ৰাণ কৰে।
আনহাতে, বেটিং কৰিবলৈ নামি কলকাতাই দুৰ্দান্ত আৰম্ভণি কৰে। প্ৰথম ৬ অভাৰতে অজিংকা ৰাহানে আৰু ভেংকটেশ আয়াৰে ৪৩ৰাণ সংগ্ৰহ কৰে। নীতিশ ৰাণাই ১৭টা বলত ২১ৰাণ কৰে। ৰাহানেই ৩৪টা বলত ৪৪ৰাণ কৰি আউট হয়। শেষত অধিনায়ক শ্ৰেয়াস আয়াৰ আৰু স্যেম বিলিংছে ক্ৰমে ২০ আৰু ২৫ৰাণ কৰি কলকাতাৰ বিজয় নিশ্চিত কৰে।
