বিহাৰৰ মুখ্যমন্ত্ৰী নীতিশ কুমাৰৰ ওপৰত আক্ৰমণ চলোৱা এজন যুৱকক গ্ৰেপ্তাৰ কৰা হৈছে। দেওবাৰে মুখ্যমন্ত্ৰীগৰাকীৰ পৈতৃক গৃহ বখতিয়াৰপুৰৰ ওচৰতে ঘটিছিল এই ঘটনা।
পৈতৃক গৃহৰ কিছু দূৰত থকা স্বাধীনতা সংগ্ৰামী শীলভদ্ৰ যাজিৰ ঘৰত উপস্থিত হৈ মুখ্যমন্ত্ৰী নীতিশ কুমাৰে ফুলৰ মালা অৰ্পন কৰাৰ সময়তে হঠাতে পিছৰ পৰা নিৰাপত্তাৰক্ষীৰ দৰে পোছাক পৰিহিত এজন যুৱক ঢপলিয়াই আহে।
লগতে পঢ়ক: ভূপৃষ্ঠৰ পৰা আকাশলৈ মাৰি পঠিয়াব পৰা ক্ষেপনাস্ত্ৰৰ সফল পৰীক্ষণ ভাৰতৰ
যুৱকজনে নীতিশ কুমাৰক কান্ধত ধৰি অঁতৰাই দিয়ে। লগে লগে মুখ্যমন্ত্ৰীৰ বিশেষ নিৰাপত্তাৰক্ষী আহি যুৱকজনক ধৰি দূৰলৈ অঁতৰাই নিয়ে। পিছত যুৱকজনক গ্ৰেপ্তাৰ কৰা হয়। তেওঁৰ নাম শংকৰ ওৰফে ছটু ভাৰ্মা বুলি জানিব পৰা গৈছে।
দেওবাৰে মুখ্যমন্ত্ৰী নীতিশ কুমাৰে আন অঞ্চল পৰিদৰ্শন কৰাৰ পিছত বখতিয়াৰপুউৰৰ কেইবাখনো গাঁও পৰিদৰ্শন কৰে। তাৰ ভিতৰত তেওঁৰ পৈতৃক গৃহৰ সমীপতে ঘটা এই ঘটনাই চাঞ্চল্যৰ সৃষ্টি কৰে।
পাটনাৰ আৰক্ষী অধীক্ষক এম এছ ধিলোই দাবী কৰে যে যুৱকজন মানসিকভাৱে বিকাৰগ্ৰস্ত আৰু সেয়েহে তেওঁৰ বিৰুদ্ধে কোনো গোচৰ ৰুজু হোৱা নাই। কৰ’না পৰিস্থিতিৰ পূৰ্বে যুৱকজনে এটা অৰ্কেষ্ট্ৰ দলত শিল্পী হিচাপে কাম কৰিছিল। পিছত তেওঁ তেওঁ এখন অলংকাৰৰ দোকানতো কাম কৰিছিল।
লগতে পঢ়ক: ইউক্ৰেইনত ৰাছিয়াৰ সামৰিক অভিযানত নিহত হৈছে ১২গৰাকী সাংবাদিক
বিহাৰ প্ৰশাসনৰ সূত্ৰই জনোৱা মতে নীতিশ কুমাৰে নিজেও বিষয়াসকলক যুৱকজনৰ বিৰুদ্ধে কোনো ব্যৱস্থা গ্ৰহণ নকৰিবলৈ নিৰ্দেশ দিছে। তেওঁ যুৱকজনৰ আবেদন শুনিবলৈকো বিষয়াসকলক নিৰ্দেশ দিয়া বুলি কোৱা হৈছে।
