গুপ্তহত্যা নহয়, এইবাৰ মুক্ত হত্যাৰ উকমুকনি নেকি ৰাজ্যত!
এনকাউন্টাৰৰ নামত নিৰপৰাধী যুৱকক হত্যা কৰিছে নেকি অসম আৰক্ষীয়ে?
ৰাজ্যত সংঘটিত বহু কেইটা এনকাউন্টাৰৰ ঘটনাৰ পিছতেই অসম আৰক্ষীৰ ভূমিকাকলৈ এনে প্ৰশ্নই কৰিছে অসমৰ বহু লোকে।
শেহতীয়াকৈ অসম আৰক্ষীৰ এনকাউন্টাৰত আঘাতপ্ৰাপ্ত শিৱসাগৰৰ এজন যুৱকৰ চিকিৎসাধীন অৱস্থাত মৃত্যু হোৱা ঘটনাই সৰ্বত্ৰে প্ৰতিক্ৰিয়াৰ সৃষ্টি কৰিছে।
ঘটনা অনুসৰি আলফা স্বাধীনত নতুন সদস্য ভৰ্তি কৰাত সহায় কৰাৰ অপৰাধত চৰাইদেউ আৰক্ষীয়ে যোৱা ৩ মাৰ্চত আটক কৰিছিল শিৱসাগৰৰ বেতবাৰীৰ তামুলীবজাৰ চাংমাই গাঁৱৰ যুৱক সুৰজ গগৈক। আটক কৰাৰ পিছতেই সুৰজ গগৈক চিকিৎসালয়লৈ অনাৰ পথত অসম আৰক্ষীৰ জিম্মাৰ পৰা পলাবলৈ চেষ্ঠা কৰোতে আৰক্ষীৰ গুলিত আহত হয় সুৰজ গগৈ।
আৰক্ষীৰ গুলিয়ে ভৰিত আঘাত কৰা সুৰজ গগৈক ৩ মাৰ্চত চিকিৎসালয়ত ভৰ্তি কৰে যদিও ৫ এপ্ৰিলৰ বিয়লি ডিব্ৰুগড় মেডিকেল কলেজত তেওঁৰ মৃত্যু হয়।
ইপিনে আৰক্ষীয়ে আলফা স্বাধীনৰ লিংকমেক বুলি সন্দেহ কৰা সুৰজ গগৈ আলফা স্বাধীনৰ সদস্য নহয় বুলি এক প্ৰেছ বিবৃতি যোগে স্পষ্ট কৰে আলফা স্বাধীনে। মৃত সুৰজ গগৈ আলফা স্বাধীনৰ লগত জড়িত নহলেও অসম মাতৃৰ বাবে নিজৰ প্ৰাণ আহুতি দিয়াৰ বাবে সংযুক্ত মুক্তি বাহিনী অসম চমুকৈ আলফা স্বাধীনে তেওঁক অমৰ মৃতক হিচাপে ঘোষণা কৰে।
আলফা স্বাধীনৰ প্ৰচাৰ বিভাগৰ সদস্য ৰুমেল অসমে এক বিবৃতি যোগে অসমৰ মুখ্যমন্ত্ৰী ড০ হিমন্ত বিশ্ব শৰ্মাক আৰু অসম আৰক্ষীৰ সঞ্চালক প্ৰধান ভাস্কৰজ্যোতি মহন্তক প্ৰশ্ন কৰে যে কাৰ নিৰ্দেশত নিৰপৰাধী যুৱক সুৰজ গগৈক হত্যা কৰা হ’ল সেই বিষয়ে মুখ্যমন্ত্ৰী আৰু ডিজিপিয়ে নিজৰ স্থিতি স্পষ্ট কৰিবলৈ কয়।
ইপিনে পৰিয়ালৰ লোকৰ অভিযোগ পৰিকল্পিত ভাৱে হত্যা কৰা হ’ল সুৰজক। মঙলবাৰৰ পুৱালৈকে সম্পূৰ্ণ সুস্থ অৱস্থাত থকা সুৰজ গগৈ হঠাৎ অসুস্থ হৈ পৰে আৰু কিছু সময়ৰ পিছতেই চিকিৎসকে তেওঁক মৃত ঘোষণা কৰে। পৰিয়ালৰ লোকে তেওঁৰ মৃত্যুক সহজভাৱে লব পৰা নাই।
এটি তিনিমহীয়া কণমানি সন্তানৰ পিতৃ সুৰজ গগৈৰ মৃতদেহ বুধবাৰে নিশা আহি পোৱাৰ পিছতেই কান্দোনত ভাগি পৰে পৰিয়ালৰ সদস্যসকল।
