“ৰাজনীতি এৰি ঘৰত ৰন্ধাবঢ়া কৰক।” মহাৰাষ্ট্ৰৰ বিজেপি নেতা চন্দ্ৰকান্ত পাটিলে এনচিপি নেত্ৰী সুপ্ৰিয়া সূলেক উদ্দেশ্যি কৰিছে এই মন্তব্য। সুপ্ৰিয়াই স্থানীয় নিৰ্বাচনত অ’বিচি কোটা সংৰক্ষণকলৈ বিজেপিৰ সম্পৰ্কত মন্তব্য কৰিছিল। ইয়াৰ উত্তৰতে চন্দ্ৰকান্ত পাটিলে এই নাৰী বিদ্বেষমূলক মন্তব্য কৰে।
শেহতীয়াকৈ, উচ্চতম ন্যায়ালয়ে মধ্য প্ৰদেশৰ স্থানীয় নিৰ্বাচনত অন্যান্য পিছপৰা শ্ৰেণীৰ বাবে আসন সংৰক্ষণৰ অনুমতি দিছে। এই প্ৰসংগত সুপ্ৰিয়াই কয়, “মধ্যপ্ৰদেশৰ মুখ্যমন্ত্ৰী শিৱৰাজ সিং চৌহান দিল্লীলৈ আহিছিল আৰু বিশেষ কাৰোবাক লগ কৰিছিল। ইয়াৰ দুদিনৰ ভিতৰতে মধ্য প্ৰদেশত অ’বিচি সংৰক্ষণৰ অনুমতি দিয়া হয়। মই নাজানো ইমান সোনকালে কেনেকৈ অনুমতি পালে।‘’
উল্লেখ্য যে বিজেপিয়ে কংগ্ৰেছ আৰু শিৱসেনা শাসিত মহাৰাষ্ট্ৰতো অ’বিচি সংৰক্ষণৰ দাবী জনাইছে।
সুপ্ৰিয়াৰ এই মন্তব্যৰ পিছতে পাটিলে কয়, “আপুনি ৰাজনৈতিক ক্ষেত্ৰত কিয় আছে? ঘৰলৈ যাওক আৰু ৰন্ধাবঢ়া কৰক।‘’
তেওঁ লগতে কয়, “দিল্লীলৈ গৈয়েই হওঁক বা কবৰস্থানলৈ গৈয়েই হওঁক, আমাৰ অ’বিচি সংৰক্ষণ কৰি দিয়ক।‘’
এনচিপিয়ে এই মন্তব্যৰ তীব্ৰ গৰিহণা দিছে। আক্ৰমণৰ সন্মুখীন হৈয়েই চন্দ্ৰকান্ত পাটিলে স্পষ্টীকৰণ দি কয়, “মই মহিলাসকলক সন্মান কৰোঁ। মই সুপ্ৰিয়াজীৰ সৈতে বহুত কথা পাতো। মই মাত্ৰ ক’ব খুজিছিলো যে তেওঁ গাওঁলৈ গৈ মানুহৰ কাষত থিয় দিয়ক।”
এনচিপি নেতা বিদ্যা চৌহানে কয়, “চন্দ্ৰকান্তে ৰুটি বনাবলৈ শিকিব লাগে যাতে তেওঁ তেওঁৰ পত্নীক ঘৰত সহায় কৰিব পাৰে। আমি জানো যে বিজেপিয়ে মনুসংহিতা মানি চলে। কিন্তু আমি আৰু মুখ বন্ধ কৰি থাকিব নোৱাৰো।”
মহাৰাষ্ট্ৰৰ উপ মুখ্যমন্ত্ৰী তথা সুপ্ৰিয়াৰ ভাতৃ অজিত পাৱাৰে কয়, “তেওঁৰ এনেদৰে কথা কোৱাৰ কোনো অধিকাৰ নাই।‘’
লগতে পঢ়ক: অসম প্ৰদেশ কংগ্ৰেছ কমিটিৰ কাৰ্যনিৰ্বাহকৰ পৰা নেতা ৰকিবুল হুছেইনৰ পদত্যাগ! বাতৰি অস্বীকাৰ হুছেইনৰ
আনহাতে, সুপ্ৰিয়াৰ স্বামী সদানন্দ সূলে কয়, “মোৰ পত্নী এগৰাকী মাতৃ, এগৰাকী গৃহিনী আৰু এগৰাকী সফল ৰাজনীতিবিদ। মই তেওঁৰ বাবে গৌৰৱান্বিত। বিজেপিয়ে সদায় বিদ্বেষমূলক আচৰণ কৰে আৰু মহিলাসকলক হাৰাশাস্তি কৰে।
