দিল্লীৰ বিতৰ্কিত প্ৰশাসনিক বিষয়া দম্পতী সঞ্জীৱ খিৰৱাৰ আৰু ৰিংকু ডুগ্গাক কেন্দ্ৰীয় চৰকাৰে অৰুণাচল প্ৰদেশ আৰু লাডাখলৈ শাস্তিমূলকভাৱে বদলি কৰে। নিজৰ পোহনীয়া কুকুৰৰ ‘সান্ধ্য ভ্ৰমণ’ৰ বাবে দম্পতিহালে ত্যাগৰাজ ষ্টেডিয়ামত অনুশীলন কৰি থকা খেলুৱৈসকলক ষ্টেডিয়াম এৰিবলৈ নিৰ্দেশ দিছিল।
তেওঁলোকৰ বিৰুদ্ধে উত্থাপিত অভিযোগৰ পিছতে কেন্দ্ৰীয় চৰকাৰে আমোলা দুগৰাকীৰ বিৰুদ্ধে তৎকালীনভাৱে এই শাস্তিমূলক ব্যৱস্থা গ্ৰহণ কৰে।
কেন্দ্ৰীয় চৰকাৰৰ এই সিদ্ধান্তৰ পিছতে এতিয়া সৃষ্টি হৈছে বিতৰ্কৰ। এই সিদ্ধান্তৰ দ্বাৰা কেন্দ্ৰীয় চৰকাৰে অৰুণাচল আৰু লাডাখৰ প্ৰতি বৈষম্যমূলক আচৰণ কৰা বুলি অভিযোগ উঠিছে।
যদি এইয়া বিষয়া দুজনৰ প্ৰতি গ্ৰহণ কৰা শাস্তিমূলক ব্যৱস্থাই হয়, তেনে বিষয়াৰ পৰা অৰুণাচল আৰু লাডাখৰ জনতাই সুশাসন লাভ কৰিবলৈ সক্ষম হ’বনে বুলি সামাজিক মাধ্যমত ব্যাপক প্ৰতিক্ৰিয়াৰ সৃষ্টি হৈছে।
সামাজিক মাধ্যমত এগৰাকী ব্যক্তিয়ে কয়, “ভাৰতীয় সংবাদ মাধ্যমসমূহে ষ্টেডিয়াম বন্ধ কৰি তেওঁলোকৰ পোহনীয়া কুকুৰ খোজ কঢ়োৱা দিল্লীৰ দুজন আইএএছ বিষয়াক অৰুণাচল আৰু লাডাখলৈ বদলি কৰাৰ বিষয়টোকলৈ উৎসাহ প্ৰদৰ্শন কৰিছে। তেওঁলোক মেট্ৰ’ মিডিয়া। সীমান্তৰ ৰাজ্যসমূহৰ সমস্যা আৰু এই সম্পৰ্কীয় বৈধ প্ৰশ্ন সুধিবলৈ তেওঁলোক অক্ষম।”
আন এগৰাকী ব্যক্তিয়ে লিখিছে, “গতিকে লাডাখ আৰু অৰুণাচল প্ৰদেশক বহুতে শাস্তি প্ৰদান কৰা স্থান বুলি গণ্য কৰে! মই ভাবো এইখন এখন ধুনীয়া ঠাই।উত্তৰ-পূবক বৃদ্ধ ৰাজনীতিসকলক ৰাজ্যপাল হিচাপে শাস্তি বা অৱসৰকালীন পোষ্টিং দিয়া স্থান হিচাবেও গণ্য কৰা হয়। এই মানসিকতাৰ কেতিয়াও পৰিৱৰ্তন নহ’ব।”
আন এগৰাকী ব্যক্তিয়ে ক্ষোভ প্ৰকাশ কৰি লিখিছে, “আমি শাস্তি হিচাপে বদলি কৰা লোকসকলক প্ৰেৰণ কৰিবলৈ বাকী ভাৰতৰ বাবে চাইবেৰিয়া নহয়। অৰুণাচল প্ৰদেশ মেধাসম্পন্ন বিষয়াৰ পোষ্টিঙৰ বাবে সঠিকভাৱে সংৰক্ষিত থাকিব লাগে।”
আনহাতে তৃণমূল কংগ্ৰেছৰ সাংসদ মহুৱা মৈত্ৰই বিষয়া দুজনৰ বিৰুদ্ধে কেৱল শাস্তিমূলক বদলিৰ দ্বাৰা গৃহ মন্ত্ৰালয়ে দায়সৰা কৰ্তব্য কৰিছে বুলি অভিযোগ কৰিছে।
তেওঁ লগতে এনে অযোগ্য বিষয়াক অৰুণাচল তথা লাডাখলৈ বদলিৰ দ্বাৰা ৰাজ্যখনক অপমান কৰা হৈছে বুলিও মন্তব্য কৰে।
